Daily Newspaper

KAN VOTE THLAK DAN RILRU THLAK THEI I LA…

11

-Raizawka; Camp: ZTN

Kan rinaia nasa daihin hriin min luhchilh lehzual ta a, tam tak rilru chu a mangang zual hle tih hai leh phat rual a ni lo. Social media lamah lah hri ai maha chakin kan vawrh darh zung zung mai bawk si nen, hlauhthawnna a zual teh e. Hetiang thil vel hi a theh darh hmasatu nih loh hlau ang hrimin sem darh chiam chiam duh lem suh. Mi pawn phone an nei ve tho a, an hmu ve tho ang. Tin, hetiang hri kai thar an awm tih vel bawr thu hi i chhiar a nih chuan ngawi rengin chhiar mai la, i rilru tih hah lutuk nan hmang suh. I rilru ti thawveng thei thil ngaihtuah la, Bible i chhiar peih kher lo a nih pawhin, eng lehkhabu emaw hrim hrim pawh chhiar a tha. Fiamthubute kha han chhiar la, i rilru ti zangkhai thei tur thil ngaihtuah hram hram rawh. Khai a, helam hi ka sawi tum a ni lo, tawk teh se.

Tun hnaiah Mizo zinga mi chhuanawm, central service mi tam lo tak kan neih zinga pakhat chuan mual min liamsan leh ta a. A pawi ngawt mai. An hna atangin chawl tawh mah se hetiang mi an lo dam ve hrim hrim hi a thlamuanthlak tehlul nen. Chutih lai vel bawr takah chuan UPSC hnuaia central service exam result a rawn chhuak a, chutah chuan Mizo kan tel loh thu leh Chakma pakhat a tel thute kan han hre zui a, social media leh chanchinbu lamah te thahnemngaihna thu hmuh tur a tam zui hle. Kan mithiamte leh mi thahnemngaite thahnemngaihna hi kan zirlaite pawh hian hriain, central service lama Mizote kan pun deuh deuh theih nan tan lain, thahnem han ngai zual deuh deuh se a duhawm ngawt mai. E khai, ka sawi tum loh lam hlir ka la sawi! Helam chu duhtawk i la, a tawp nan – kan rama hnathawh tum vek lo hian Pu RK. Lianzuala’n, ‘Ram danga lehkha zir tura in kal thei a nih chuan, hnathawk tur pawhin in chhuak ngam tur a ni’ a tih kha hre reng teh ang u.

A thui lutuk dawn e. Ka sawi tum tak zawk chu tawi tein sawi ka’n tum mai ang e. Kan hma lawkah LC/VC inthlan kan lo hmabak leh ta. Veng leh khaw hrang hranga candidate-te pawh kan hre ta zel a, boruak a inmung tan mek. Hetiang inthlanah hian ngaihtuahna zau tak pua mahni chhungkhat lainate, thiante tih ringawt lo deuh rilru hi kan put ngam a tul viau mai. Induhsak chu thil tih awm tak a nih rualin kan duhsak tur a chu tu nge, a tha takzet em, kan khawtlang tan a tha ang em, duhsakin vote ringawt i la, kan khawtlangin eng angin nge a thatpuiin a thatpui loh ang tih te pawh ngaihtuah ngam a tul hle mai. In candidate zingah i laina hnai leh thian aiin i hlat deuh zawk nia i ngaih kha mi tha zawk a ni ve thei tlat. Khawtlang nuam leh tha nei tur chuan chhungkua atanga tan a pawimawh tia kan inzirtir ang tho hian, ram nuam leh duhawm nei tur chuan khawtlang atanga bultan a pawimawh ve tho. Khua leh veng tinin hma kan sawn a, tha tak leh fel taka ro kan rel chuan ram nuam zawk chu a lo thleng mai ang. Kan khua, kan veng bak hi a hranpa taka tih nawm tur ram a awm chuang lo.

Thenkhat chuan, kan ram politics hrim hrim hi beidawnthlak leh siam that hleih theih tawh lohah ngaiin kan hnual lek lek dawn ni hian a lang thin. I hnual mai lo ang u. Kan tuma kan duh tak tak a nih chuan siam that theih a la ni reng ang. Tin, mi tute emaw chuan, kohhrana inhmang deuh te leh kohhran upa te thlengin LC/VC leh MLA thleng pawhin, hetiang lama an in-candidate te, politics a an zuan luh hrim hrim te hi tul ti lo leh anmahni tan pawha thil tha lo, hminghliauna mai mai nia ngai an awm chawk. Kan tun dinhmun atanga thlir chuan a awm viau mai. Mahse, tuitifiminu hian vawi leh khatah tui nu a ti fim vek thei bik ngai lo a, rei iak tui chungah a inphiah kual hnuah a lo fim ve mai thin ang hian, kan tei rei peiha beidawng loa kan nghah fan fan peih phawt chuan kan la fim leh thei ngei ang. Amaherawhchu, kohhran leh pawla chanvo leh nihna hmachhuan emaw chutiang atanga intih lar phawta politics lama zuan luh tum sa rilru pu an lo nih hlauh chuan, anmahni leh kan ram hian a chhiatpui tial tial thei thung ang.

Tichuan, kan vote thlak dan rilru hi thlak ngam i la, vua leh vang, laina hnai, thian tha tih vel mai mai ni loin, mi dik, mi tha, veng leh khua leh ramin kan chhawr theih tur ngei thlang ngam turin kan zalênna hi huai takin i hmang ngam ang u.

Taka, hmai tuam leh social distancing kha theihnghilh lo i la aw…

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy