Daily Newspaper

KAN ZE PHAWRH LANGTU COVID

37

-Mahmuaka Chhakchhuak

Kum 2019 tawp lam atangin khawvelin he CoviD Hrik hi a mikhual tan chauh nain tunah meuh chuan khawvel pum tibuaitu a ni ta. Sawi dan chi hrang hrang a awm a, thenkhat chuan China siam chhuah nitein an sawi a, Khawvel ram ropui America meuh pawhin a ring viau bawk a ni awm e. |henkhat thung chuan Pathian hremna angah te an ngai bawk a, khawvel mihringte kan sual tawh em vangin Pathianin min hrem niin an sawi a. |henkhat leh te chuan thil thleng pangngai, khawvela lo awm ve rengah te an ngai bawk a. Keini lo sawifiah thiam theih a ni lo a, keini lo hrilhfiah thiam chi rual erawh a ni si lo. Chiang taka kan hriat theih awmchhun chu China atanga rawn darh tan a ni tih chauh hi a ni rih a, khawvel hmun dangah a darh zau zel a, vawiinah chuan kan tuallai a rawn thleng ta a nih hi. Mi tam takin an thihpui tawh a, nitinin kai thar an awm zelin thih phah an awm zel bawk a, kan tuar a, kan rum a, kan mangang ta a ni. Ram ropui ang buai a, ram rethei an hlim bik chuang lo a, mi lian leh te ber thlengin kan phek buai ta luai luai a, ram dang aia kan vanneihna erawh kan ram chhungah he hripui leng vanga thihna la thleng lo hi a ni chauh ta. Engtikah nge he hri vanga thihna hi a thlen dawn tih lah chu vana kan Pa chauhin a hre thung si a, hlauthawng takin kan awm chawrh chawrh ringawt a, kan thiam dan danin kan inveng ringawt a, kan invenna lah chu a der dep ang reng fu lawi bawk si.

Kan ram a rawn lut a, kan khawtlangah a rawn thleng a, kan tuallaia hmun a chan ve tawh tlat vangin kan invenna hmanraw beitham tak nen chuan fimkhur takin kan awm reng a ngai a, chutih lai reng chuan rinlohna lamah kai thar an lo awm leh thut thut thin bawk si. Kan Aizawl khawpui ber lah chu tunhma kha chuan khawpui chhung leh dai vel zawng zawng tih theihin hlimhlawpna hmun a nih thin nen tunah chuan a rumin a rum tlawk tlawk a ni ber a, zankhat thilthuin inralrinna dar an khawng ri thut thut thin bawk a, Biakbuk meuh pawh luah lum hleih theih a ni lo hial a, sakhaw rawngbawltute meuh pawhin min thlamuan thei ta meuh lo zawng a nih tak hi. Kum upa leh kum lama naupang zawkte dinhmun a derthawng zawka hriat vangin in chhunglumah kan tawmimtir ngun deuh a, a thalai zawkte erawh fimkhur tak chungin pawn kan chhuak ta zauh zauh a, ei leh bar zawnna hmun pan loh theih a ni bawk si lo. A then tan phei chuan ei bel ber leihbuak a ngaih phah hial a, thahnemngai takin han ti lui hram hram zel pawh nise midang tana ban ngam rual loh turin kan ral lian – hri leng ber chu mita hmuh tham loh a nih ang takin khawnge a awm a, khawnge a bihruk tih kan hriat tlat si loh vangin kan chenpuite tih chauh loh chu kan hlau ta vek si a nih hi. Chhung leh khat mai bakah thiantha te ngei ngei pawh thinlungin duhsak em em mah ila kan inchhunga zankhat emaw chauh pawh rawn riak turin kan remti ta meuh lo te hi he hri vang vek hi a ni si a.

Chutiang a nih mek laiin kan zo nun zemawi tak thin chu he hri vang hian phawrh lanin alo awm a, hetiang khawp hian mizo nun hi alo duhawm a ni maw tih vawng vawng turin mita hmuh theih leh benga hriat khawpa ringin vawiinah ala thleng si. Chungte chu an thawm hriat a nuam a, anmahni va hre chiah lo pawh ni ila awmhmunah ‘anni hi chuan Mizo nih an va ti nuam tak em, an ni ang hi kan khawtlangah hian midang han awm ve sela ava nuam dawn tak em aw’ te kan han ti ringawt a, an hming kan sawi bang thei lo a ni. Puang chhuakin au chhuak kher lo mah ila chawimawina no kan hlan a, zo nun ze mawi chhawm nung zel turin kan lo duh em em a ni. Nimahsela chutiang ni lo zawngin he hri hian kan mizo khawtlangah nunphung a rawn hailang bawk a, dawra thil zawrh man tih to phah an awm a, mizo leh mizo karah pawh nimin aia hlep tam tum ta zawk kan awm bawk a. Silchar atanga hnathawk tur vai a ruka rawn luhtir tum kan awm bawkin sorkar hnathawk zingah pawh thawk loa hlawh chauh duh te pawh kan awm zel bawk a. Biakbuk enkawltu (Chowkider) tan ngei pawh khawhar vawng vawngna tham zetin kan nunphung tihdanglamin a awm ta hial a.

Langsar taka midang tanpuina hlan kan awm bawk a, pawl hming tih lansarhna atana sum leh pai tam tham tak pawh seng hreh hauh lo te, chanchinbu pheka lang ve ngei tura ei leh in tur semte pawh kan awm zel bawk a nih hi. Mahni hnuaia thawkte ei leh in tur pawh pek theih loh reng laia langsar taka midang tanpui te pawh he hri vang zet hi chuan kan lo awm ta hial a nih hi. Tunhma lamah kha chuan a tul chang chauhin hmaikawr kan vuah a ni a, tunah chuan kan duh emaw duh lo emaw lohtheih lohin hmaikawr vuah a ngai a, hmaikawr vuah lo chu hrem theih tih hial te a ni. Hetianga tangkai taka hmaikawr kan hmang ang chiahin hri leng pawh hi kan politician te chuan hmaikawrah an hmang leh ta zel a, mipui bumna atan kan lo hmang ta a nih hi. Langsar takin sum leh pai an thawh a, a hman lehna lam erawh kan hre leh mumal thei meuh lo thung thin. A changin rang takin roreltuin ro a rel a, a changin a ngawi leh tlat thung a, hmun thenkhatah tanpuina an hnianghnar viau laiin hmun thenkhat thung chu an ro tlawk tlawk a, tawngkam hmanga sawifel mai tum tawk lah kan awm reng bawk a nih hi. Zep theih engmah awm loin a lian ber atanga a te ber thlengin kan inpuang zel bawk si a. He hri zet hi chu a ngeiawm a, a thinrim thlak a, a huatthlalaawm takzet a nih hi. Min kiansan hun hi kan hre bawk si lo a, kan mithiam te lahin zual zel zawk turin an la sawi rih a ni awm a, heti hrim hrim chuan kan pawnlang nun mai bakah kan chhungril nun thlengin min la phawrh fai leng lo ang tih a sawi theih ta hauh loh mai le.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy