Daily Newspaper

“Kan Zotlang ram nuam” hla thluk kha?

78

-Hruaia kawlni,
Salem Veng, Aizawl.

Lockdown vangin mitin mahni inah kan tawmim a, hunawl kan ngah hle. Social media-ah pawh kan tam tlang viau niin a lang. Kan thianho titi mai maina whatsaap group pakhatah hian kan hlaphuah thiam mi hmasa, Vankhama, Lalzova, Rokunga leh P.S.Chawngthu te thlengin an hla tamtak kha sap hla thluk entawn leh a then phei chu sap hla thluk ngialngan hmanga siam a ni tih thu kan sawi a.

Kan hla phuahthiam hmasate chang ni lovin, kan mithiam ziak leh chhiar thiam hmasa, kamding leh kohhran lama sulsutute zawng zawng deuh thaw kha Sap missionary te ke bula seilian an ni a tih theih hial awm e, khang lai hunah khan sap ngaihsanna a nasa em em a, sap tih dan leh nun dan zawng zawng chu dik veka ngaihna te, a bik takin kan Zosapte phei chu an inchei dan leh an mizia thlengin kan entawn a. Sap culture hrim hrim kha kan hmuh phak chin chu kan ngaisang em em vek a. Tunlai tawngkam lar Colonial hangover kan tih tak fo, sap tih dan leh nunphung hrim hrim la entawn tlatna hun kha a ni a, dik tak phei chuan hla leh music lamah phei chuan keini Mizo te kha kan la pachhe hle, a vengva leh hawizau deuh te kha chuan sap hla thluk nalh tak tak zulzuia hla an siam kha an demawm hran loh.

Chung kan sawi zelna atang chuan Rokunga hla hmingthang leh lar tak ‘Kan zotlang ram nuam” tih hla leh thluk chungchang kan kai a, Mizo zingah chuan ala damlai zingah thawnthu ziakmi(novelist) kan neih that ber tih hial ngam kan thianpa Pu Taitea (C.Lalnunchanga), Mizo tawng lehkhabu ziak a banphak chu a hlah lo tih tur khawpa thil chhiar nasa leh midang kawm a, thil zawtchik peih tak te nen kan hriat dan inang lo lai kan sawiho zelna atangin “Kan Zotlang ram nuam” hla thluk chungchang hi tlem kan chhui zui ta a ni.

Amah Rokunga hriatrengna atana Rokunga Memorial Society leh Aizawl Development Authority te lehkhabu buatsaih “Mizo nih tinuamtu ROKUNGA” kum 2008 a tih chhuah chu ka han keu let vat a, mi chi hrang hrang; Mizo zinga thu leh hla thiam leh mi langsar pui pui leh amah hmu phak ten Rokunga an hriat dan te, a hla atanga a khawvel thlir dan, a hla thu kal hmang, a hla a hmeichhiate dinhmun thlengin an khel a, Rokunga chanchin mai bakah a hla chungchangah lepse loh lai an nei miah lo a nih hi tih tur khawp hialin an khawrh kim. Chutihlai erawh chuan ka thil zawn ber pakhat, khawi atanga Rokunga hian solfa leh hlathluk hi siam thiam em em nge a nih a, tih leh eng tik hunah chiah nge he hla hi a phuah tih chu ka hmu mai lo. Amaherawhchu he lehkhabu atang hian thil hriat belh tur leh chhuizauna atana tangkai tak tak erawhchu a tam nangiang mai.

Pu Rokunga khan hla 120 bawr vel phuah ni a hriat a ni a, kum 1939-ah a hla hmasa ber “Vanhnuai khuavel sakhming chhiarin” tih atanga a hla hnuhnung ber kum 1969 May-ah “Sualin bo mah ila” tih a phuah inkar, kum 30 zet chhungah hian ‘kan Zotlang ram nuam” tih hi a hmasa lam a nih ngei hmel. He lehkhabu kan sawi lai “Mizo nih tinuamtu Rokunga” tih lehkhabu phek 24 tawpah hian ti hian a inziak a, ‘A hla phuah zinga lar ber pawl chu, “Kan Zotlang ram nuam” tih hi a ni a. He hla hi a chhuahtirh chuan Pu S.Barkataki, Superintendent of Lushai Hills,(tuna Deputy Commissioner) khan a duh khawp a, tiin.

Chhinchhiahna dang atanga a lan danin Pu S.Barkataki IAS kha kum 1949-1953 thleng Mizoramah a awm a, chutiang a nih chuan he hla hi Pu Rokunga hla phuah hun chhung kum 30 zet(1939-1969)ah a hmasa pawl a ni ngei awm e. Assam Regiment hovin an band party sak atan mawi an tih vanga Pu Rokunga an dil hial khawpa thluk sak nuam leh rem nuama Pu Rokungan a siam dan lam hi kan thupui ber zawk a ni bawk a, i’n thlur bing leh teh ang.

Mi thenkhat sawi danin he “Kan Zotlang ram nuam” tih hla thluk hi Bob Wills hla ‘Faded love’ tih kum 1950 a tih chhuah atanga a thluk hi lak ni awmin an sawi a. Chutihlai chuan Pu C.Lalnunchanga hian a lehkhabu hlui leh hlu tak ‘|halai Hla Bu’ amah Rokunga siam ngei copy chu min entir a, phek 46-naah chuan ‘Kan Zotlang ram nuam’ tih hi a hla thu leh solfa nen a chuang a, a kil dinglam chung sirah kum 1944 a lo inti kalh a. Chuti a nih si chuan thenkhatin Rokunga hian, ‘Kan Zotlang ram nuam’ tih hi Bob Wills-a hla “faded Love” tih aiin a phuah hmasa ngei tih a chiang ta hle. Tunlai chhanah Internet kaltlangin thil zawn a awlsam tawh bawk a, chu Sap hla Faded Love tih hla thluk lo kalna lam chu kan han enzui zel chuan chu hla thluk chu Western swing fiddle an tih ho zinga American fiddle tune kal zelah kum 1856-a ballad, “darling nelly gray” atanga he hla thluk hi lo kal zel a nih dan te chhiar tur a lo awm ta zel a. Youtube lamah The Texas Fiddle Collection a Johnny gimble-a violin tum hmanga ‘Darling Nelly Gray’ te han ngaihthlak chuan tuna kan hla sawi ‘Kan Zotlang ram nuam’ tih te chu a thluk alo inzawl viau tih a hriat theih ta.

Mizo te hla tha leh mawi kan hnam ro hlu pakhat “kan Zotlang ram nuam” Rokunga hla hi sawi nep leh a hlutna tihbo tuma chhui zui chiam kan ni lova, a hlut em avang zawk leh amah Pu Rokunga hi zirna mumal pawh nei si lova hetiang solfa thiam leh hla thluk, sak nuam leh mawi si siam thiam ta em em mai nge a nih hriatchhian a, a nihna tak zawn chhuah duh vang zawk a ni. A tira kan lehkhabu sawi “Mizo nih tinuamtu Rokunga”ah bawk khan han let leh ila, kha lehkhabu phek 48-naah khan thupui pakhat “Pu Rokunga thukhawchang” tih hmanga C.Hermana, Mission veng ziak a awm a, chutah chuan ti hian a in ti,

“Amah kohhran upa a niha kan hla sak thinte Western Love Song leh Cowboy hlate a nih hlawm thin avangin kan inthlahrung rilru hle thin a. Mahse, Pu Rokunga chuan aw zaidam tak mai hian, ‘kei chu enghelhah min nei reng reng suh u, in zai ri hi mawi ka ti a, in hla duh sa rawh u, tihian in sirah in zai ngaithlain ka lo thu ngawi ve mai mai ang e,’ a ti a. |hutthleng hniama khup bawh vanga thu hian min lo tawiawm thin a. Chutih hun laia kan hla sak thinte zinga There’s more pretty girls than one tih chu, Tur nipui kan do dai tih a phuah thluk nen hian a inzul hle a. Don’t fence me in tih hla kan sak thin pawh, hlim rawh u, nui rawh u, tih a phuah thluk nen hian a inunau viau bawk. Tun hnua ka han ngaituah let hian khatih hun laia kan zai rite kha hla thluk fawhkaiah a lo hmang tangkai thiam hle thin niin ka hria a. Music lama a rilru tuanran leh themthiamzia kha mak ka ti thar hnuhnawh hle thin,” tiin.

He thu ziaktu Pu Hermana sawi ang hian Rokunga khan a banphak leh a bengin a hriat phak rimawi chitin mai, thalai ten tuipui ral hla an sak te, thli thawin raw hung a chhem ri vuk vuk te thleng khan rimawi duanna ki pawimawh takah a lo chantir thiam vek zawk a lo ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy