B2022 September atanga hlawh la tawh lo Dampa Tiger Reserve vengtute chu hlawh lak ngiatin an nuar a, kar hnih a liam hnu ah pawh hotute lam atangin an thil ngiat tihhlawhtlin tuma hma an lak thu emaw harsatna la awm emaw hrilhhriaa dawr an la ni lo.
Dampa Tiger Reserve & Sanctuary vengtu Tiger Protection Force (TPF) Association hian kumin February khan an hotute hnenah ziaka thlenin, hlawh an lak har avang leh fieldgear an dawn tur ang an dawn loh avangin harsatna an tawh phah nasa tih an sawi a. February ralhmaa an lak loh chuan March atangin duty tura chhuak tawh rih loin, nitin mamawh ngaihtuahna kawng dang an zawn mai a ngaih thu an sawi. An harsatna hriatthiam pui a, an hlawh lak loh chin zawng thla kima an lak theihna’n hma lakpui turin an ngen a ni.
Kumin February 14 khan Dampa Tiger Reserve field director chuan ziakin sawrkar lam harsatna a hrilhfiah a. National Tiger Conservation Authority (NTCA) lam chuan kum 2022- 2023 chhunga an sum pek tur hi peih sa diamin an kawl tawh a. Pekchhuah an hmanhmawh avangin a khat tawkin state sawrkar lam an rawn hrilh reng zawk a. Amaherawhchu, kumhlui lama sum hman zawh loh tlem ala awm avangin an la pechhuak thei lo mai chauh niin a sawi.
Kumhlui sum la hman loh tih hi, TPF uniform leh fieldgear leina tur a ni a. Kumin January khan DPAB approval an hmuh theih chauh avangin expenditure sanction tura an dilna a thang mek a. Chumi a fel hunah sum hi hman theih chauh a ni dawn. Hei hi hman zawh a nih a, PFMS portal-ah zero balance a nih veleh NTCA-in kumthar sum an rawn pechhuak ve nghal dawn, tiin a sawi a ni.
Field director-in ziaka sawrkar lam harsatna a hriattir bak hi, an nawrh hma leh nawrh hnu ah, tun thlengin tawngka leh ziak pawhin sawrkar lam atangin thuthar dawn an la nei lo tih TPF hruaitute chuan an sawi a ni.
TPF Association chuan nikum hmasa lam pawh khan rei tak chhunga hlawh lak loh avangin an lo nuar tawh tih an sawi a. Nawrha nawrchhuah kher ngai dawn nia an hriat avanga ti leh ta mai an ni tih an sawi.
Hetihlai hian environment venhim leh humhalhtu pawl – Conservation Mizoram leh Centre for Environment and Social Justice Mizoram chuan ziaka ngenin, TPF nawrhna hian Dampa Tiger Reserve & Sanctuary a nungcha leh ramngaw in a tawrh nasat avangin nawrh titawpa an hna chhunzawm leh turin an ngen a. An ni pawhin thuneitu lamah an theih ang anga an thil nawr hi lo nawrpui an intiam tih an sawi a. Hemi chungchang hi TPF Association hian March 15 emaw March 16 ah emaw hian ngaihtuah ho an tum tih thu dawn a ni.
Kar hnih hnu ah pawh nuarten thuneitute ngaihsak hlawh lo
