International break a nih hnuin tualchhung league khelh chhunzawm leh a ni a, kar tawpah inkhel hmuhnawm tak tak hmuh tur a awm. January 2016 hnu lama an chak theih ngai lohna Anfield-ah ngei an chak vangin Manchester United tantute tan kar tawp nuam bik a ni ngei dawn. Kar tawpa football hnuhma langsar zual kan tarlang leh ang.
English Premier League
Pathianni zan khan Manchester United chuan an hmelma lian ber Liverpool chu Anfield-ah ngei 2-1 in an hneh. Liverpool laka an chak hi manager Reuben Amorim tan thil chhinchhiahtlak a ni a, United a enkawl hnuah an mualah leh Mimuala hnehna a chan zawn vawi khatna a ni. Amorim hi EPL season hnihah champion lai hneh ve ve thei pathumna a ni a, Manuel Pellegrini leh Antonio Conte te hnung a zui.
Pathianni zan khan Aston Villa chuan 2-1 in Tottenham an hneh a, he inkhelah hian Morgan Rodgers chuan assist a nei. Rogers hi kum 2025 chhungin EPL-a assist ngah ber a ni a, assist vawi kua a nei tawh.
Inrinni zan khan Manchester City chuan Erling Haaland goal hnih thun hmangin an mikhual Everton an hneh. Haaland hian club leh ram tan khelh 11 chhung zet goal a thun zawn tawh a. Season kal mekah club leh ram tan vawi 13 khelin goal 23 ngawt a thun tling tawh bawk.
Nottingham Forrest in an ban tan Ange Postecoglou season hnih chhungin a team enkawl vawi 26 ngawt a tlawmpui ta a, season hnuhnung pahniha tlawm tam lamah Heidenheim manager Frank Schmidt nen an intluk. Postecoglou hian Nottingham Forrest hi ni 39 chauh a enkawl hman a, EPL-ah manager ni rei lo ber dawttu niin a chungah hian ni 30 chhung Leeds United enkawltu Sam Allardyce a awm.
Ball kanga hlauhawm thin Arsenal an hlauhawm chhunzawm zel. Gunners hian 2023-24 season tan atanga tun thlengin corner atangin goal 37 zet an thun tawh a, an mahnih hnaih bertu Chelsea chuan corner atangin goal 22 a thun ve tawh.
Pathianni zanah Liverpool an hneh tumin Bryan Mbeumo chuan second 62-na lekah Manchester United hmahruaina goal a thun. Mbeumo hi Liverpool leh Manchester United te inkhelh tuma goal thun rang ber a ni.
Spanish La Liga
Inrinni zan khan champion lai FC Barcelona chuan harsa takin Girona an hneh a, an chakna goal hi minute 90+3-a an thun niin season kal mekah stoppage time-a chakna goal an thun vawi hnihna a ni.
Kar tawp hian Barcelona leh Real Madrid te an inhmachhawn dawn a, season nga chhung table-ah pakhatna leh pahnihna luah chunga El Clasico a khelh vawi ngana tur a ni ang.
Pathianni zan khan Real Madrid chuan harsa takin Getafe chu Kylian Mbappe goal thun hmangin an hneh. Mbappe hian Real Madrid tan Mimualah khelh riat chhung goal a thun zawn tawh a, hengah hian El Clasico-ah ngei hattrick a siam kha a tel. Real Madrid hian Getafe hi an ngam ve hrim hrim a, game sarih chhung chu goal chhuah lovin an hneh zawn hial tawh.
Real Madrid goal thun khawl Mbappe hian season tharah vawi 9 khelin goal 10 a thun tling tawh a, Ronaldo hnu lamah Real tan game 9 atanga goal 10 thun tling leh thei hmasa ber a ni. Mbappe hian season hnih chhungin chakna goal vawi 11 a thun tling tawh a, hemi chhung hian chakna goal thun tam pahnihna a ni a, a chungah hian chakna goal vawi 12 thun Robert Lewandosko a awm.
Barcelona chuan tlawm lova an kal tluang rei record an tizau zel a, inelna hrang hrangah khelh 47 chhung tlawm nei lovin an kaltluang tawh. Barca in tlawm nei lova an kal tluan rei record hmasa chu 1942-44-ah game 44 chhung tlawm an nei lo kha a ni a, he record hi game thum ngawtin an khum der tawh.
German Bundesliga
Bayern Munich chuan inrinni zan khan 2-1 in an elpui lian Borussia Dortmund an hneh. He inekhalah hian Harry Kane chuan goal khat a thun a, Kane hian club tan goal 400 a thun tling chiah. Kane hian goal a thun tluang viau a, club leh ram tan khelh 9 chhung goal thun zawnin goal 16 ngawt a thun a, club leh ram tan goal a thun zawn rei ber a ni a. Bayern Munich tan khelh sarih chhung goal thun zawn tawhin hei pawh hi club tan goal a thun zawn rei ber tum a ni tel bawk.
Kar tawp football hnuhma
