Kar tawp khan tualchhung league hrang hrang khelh chhunzawm a ni a, inkhel hmuhnawm tak tak a awm. Inkhel hmuhnawm takah hnuhma thar hmuh tur a awm nual a, kar tawp football hnuhma langsar zual kan hrut kual leh thuak thuak ang.
English Premier League
Inrinni zan khan Manchester City chu Brighton & Hove Albion hneh lovin an tlawm. City hi inkhel a hmachhawn hnuhnung pali-ah an tlawm vek. Hei hi Pep Guardiola enkawl team vawi li an tlawm zawn hmasak ber tum a ni. Guardiola hian Bayern Munich a enkawl chhungin vawi a tlawm zawnpui hman zet naa match ennawn a nih hnuin draw angin kaltir a ni leh ta zawk. Bayern Munich a enkawl laiin a zawna vawi li tlawm zawn pumpelh hram mah se City-ah erawh a pumpelh thei ta bik lo.
City hi April – August 2006 hnu lama an chet chhiat ber tum a ni. Hemi tum hian khelh li chhung tho an tlawm zawn.
Brighton lakah an tlawm tum hian City forward Erling Haaland chuan hmahruaina goal a thun a, Haaland hian EPL-ah goal 75 a thun tling chiah. Haaland hian EPL-ah goal 75 thun tling turin match 77 chiah a mamawh a, EPL-ah goal 75 thun tling rang ber record thar a siam.
City an tlawm lai hian Manchester United chuan Pathianni zan khan 3-0 in Leicester City an hneh ve thung. United tan hian captain Bruno Fernandes chuan hmahruaina goal a thun. Fernandes hian United tan goal 100 a thawkchhuak tling chiah a, goal 56 a thun bakah assist vawi 44 a nei.
Manager thar Arne Slot hnuaiah Liverpool an khel tha chhunzawm zel. Reds hian inrinni zan khan Anfield-a an mikhual Aston Villa chu 2-0 in an hneh. Arne Slot hian EPL a hmachhawn hmasak match 11 atangin point 28 a hlawhchhuahpui a, EPL manager awm tawh zawng zawng zingah an match hmasa 11-a point thawkchhuak tam ber Guus Hiddink record a nih rual. EPL a hmahruai mektu Liverpool hian 2019-20 hnu lama bul an tan that ber hun tha an tawng mek.
Liverpool tan Mohamed Salah a khel tha tluang hle a, season tharah goal 10 thunin, assist vawi 10 a nei tawh bawk a. Season kal meka Top 5 European leagues player zingah hetiang ti thei awmchhun a ni.
Spanish La Liga
Inrinni zan khan champion lai Real Madrid chuan an mikhual Osasuna chu 4-0 ngawtin an hneh. He inkhelah hian Vinicius Junior chuan hattrick a siam. Vinicius Jr hian Real Madrid tan inelna hrang hrangah hattrick vawi 4 a siam tling chiah. Brazil forward hian Osasuna hi a ngam ve hram hrim hrim a, an lakah goal riat thun tawhin, Valencia lakah a goal thun zat nen a intluk.
Real Madrid hi Osasuna lakah khelh 22 chhung tlawm nei lovin an kal tluang tawh a, club pakhat lakah tlawm nei lova an kal tluan rei ber tum a ni. Club 7 lalah khelh 22 chhung tlawm nei lovin Los Blancos hian tlawm an nei lo tawh bawk.
Osasuna an hneh tum hian Real Madrid tan Jude Bellingham chuan goal a thun ve leh ta nawlh a, hei hi season kal meka inelna hrang hrangah goal a thun vawi khatna a ni. Bellingham hian Season liam ta khan inelna a hmachhawn hmasak 13 atangin goal 13 zet a thun kha a ni a, season liam ta kha a tluk phak ta lo viau rih.
Goal hnih tala chak tluang lai Barcelona chu Real Sociedad lakah an tlawm ve teh tlat. Sociedad laka an tlawm tum hian Barcelona hian shot on target an nei miah lo nghe nghe a, hei hi September 2014 hnu lamah an khingpuite laka shot on target an neih loh vawi khatna a ni.
Atletico Madrid si nghak Oblak chuan La Liga-ah clean sheet vawi 166 a nei tling ta chiah a, La Liga-ah clean sheet nei tam pangana a ni a. An chung chiahah hian clean sheet vawi 173 nei Victor Valdes a awm.
Italian Serie A
Fiorentina forward Moise Kean chuan pathianni zanah Hellas Verona an hneh tumin hattrick a siam a, hei hi inelna hrang hrangah vawi 237 zet a khelh chhunga hattrick a siam hmasak ber a ni.
Inter Milan player pawimawh Hakan Calhanoglu chuan pathianni zan khan Napoli lakah penalty a thelh ve teh tlat. Hei hi Serie A-ah penalty vawi 17 zet a pet goal zawn hnua a thelh hmasak ber a ni.
German Bundesliga
Bayern Munich player pawimawh Jamal Musiala chuan 33.5 yds a hla atangin club leh ram tan a khelh hnuhnung vawi ngaah goal ruk a thun a. Bundesliga player zingah 33.5 yds atanga goal thun zawn rei ber a ni.
Manager thar Vincent Kompany hnuaiah Bayern Munich an khel tha viau a, season thara an match hmasa 10 atangin point 26 zet an hmu. Kompany hi Bayern Munich manager ni tawh zawng zawng zingah an match hmasa 10 atanga point hmu hnem ber a ni.
Bundesliga club thar St. Pauli chuan season tharah an mualah vawi nga ngawt an khel tawh a, goal an la thun miah lo. Anni hi Bundeliga-ah an muala goal thun thei lo rei ber a ni.
Messi
Lionel Messi chuan club leh ram tan goal 850 a thun tling ta chiah a, goal 850 thun tling turin game 1081 chiah a mamawh. Messi hi club leh ram tan goal 850 thun tling thei naupang ber a nih bakah goal 850 thun tling tura match mamawh tlem ber a ni tel bawk a, Cristiano Ronaldo aiin goal 850 thun nan Messi hiam game 98 zetin a hmang tlem zawk.
Kar tawp football hnuhma langar
