Chawlhkar tawp, Inrinni leh Pathianni khan europe a tualchhung league lian zual panga te khelh chhunzawm a ni a. Kar tawpa football hnuhma langsar zual kan thlir kual leh thuak thuak ang.
Champions & Europa League
Nilai zan khan champion lai Manchester City chuan 3-1 in Etihad Stadium-a an mikhual FC Copenhagen an hneh a, City hian si belhkhawmah 6-2 a hnehna changin quarter-final an lut. City hian UCL-a an home game-ah khelh kaw chhung zet goal thum chin an thun zawn a, Champions League-ah mahni mualah ngei khelh kaw chhung a zawna goal thum chin thun thei hmasa ber record thar an siam. City hian an mualah khelh riat chhung goal thum chin thun zawn rei record lo siam tawh Bayern Munich (2014-16), Real Madrid (1962-64) leh Benfica (1960-62) te record an khum.
Bayern Munich si nghak Manuel Neuer chuan UCL-ah clean sheet vawi 57 a nei tling chiah a. UCL a clean sheet neih ngah lamah Iker Casillas record a nihrual a, record thar siam thei dinhmunah a ding mek.
Pierre-Emerick Aubameyang chuan Europa League season kal mekah goal 9 a thun tling tawh a. Champions League, Europa League leh Europa Conference League season kal meka goal thun hnem ber a ni mek.
English Premier League
Kum 2024-ah bik Arsenal an chetha tluang zel a, EPL an khelh vawi riatah Gunners hian hnehna an chang vek a. Premier League chanchinah kum thara game khelh hmasak pariata chak vek thei palina an ni. Arsenal hian Liverpool record an nihrual a, Manchester United record nih rual tura vawi khat chak an la mamawh laiin, Manchester City record tluk tur erawh chuan vawi nga lai chak an la mamawh thung.
Manchester City laka Liverpool si phurh suttu Alexis Mac Allister khan Reds tan inelna hrang hrangah penalty vawikua a pet goal zawn a. Club leh ram tan penalty pawi 13 a pet tawhah vawi khat chiah a la thelh.
Manchester City hian January 14, 2023 hnu lamah Premier League-a goal an thun hmasak tumin tlawm an la nei lova, goal an thun hmasakna vawi 28-ah zet hnehna an chang a, vawi nga an khingpuite nen an inhnehtawk tawh.
Spanish LaLiga
La Liga-ah kum 16 mi Lamine Yamal a vul chhunzawm zel. Yamal hian Mallorca an hmachhawn tumin goal a thun a, hei hi La Liga season kal meka a goal lina niin, kum 17 la tling lo zingah La Liga-ah goal thun hnem ber record a siam a. Kum 17 la t ling lo zingah La Liga season khata goal thun hnem ber record lo awm tawh chu goal hnih ngawtin a khum der tawh. He rawlthar hi Paris St-Germain in Kylian Mbappe hmunruak luah tura lak an duh kha a ni nghe nghe.
Girona rawlthar duhawm Savio chuan La Liga season kal mekah goal 8 a thun tling der tawh a. La Liga-ah Spain rawl thar ni lo zinga goal thun hnem palina a ni a, a chungah hian Sergio Aguero, Lionel Messi leh Antonio Sanabria te an awm mek. Kum 19 mi Savio hian season kal mekah goal 8 a thun tawh bakah assist vawi 7 a nei tawh bawk a. Rawlthar zingah Europe top 5 league-ah goal a inrawlh tam ber a ni.
Real Madrid tan Vinicius Junior a khel tha chhunzawm zel a, Pathianni zan khan si li faia Celta Vigo an sawp tumin goal a thun leh. Vinicius Junior hian La Liga-ah season thum chhung goal 10 chin a thun zawn ta chiah a. Brazil player zingah La Liga-a hetiang ti thei pahnihna niin, Ronaldo record a nihrual.
Celta Vigo lakah hian Real Madrid tan kum 19 mi Arda Guler chuan goal a thun ve bawk a, ani hi Turkish player zingah La Liga a goal thun thei naupang ber niin, Celta Vigo tan kum 2017 a goal thun, kum 20 mi Emre Mor record a khum.
La Liga-a che chhe tluang tak Cadiz chuan inrinni zan khan si hnih faiin Atletico Madrid an hneh nawlh a, khelh 23 chhung zet chak thei lo zawn tawh a, top flight-a an chak loh zawn rei ber record an titawp.
Italian Serie A
Hmahruaitu Inter Milan an chetha chhunzawm zel a, vawi 10 an chak zawn tawh. Season kal mekah vawi 10 an chak zawn hi Serie A-ah an chak zawn rei pathumna a ni a. 2006-07 season ah vawi 17 an chak zawn leh 2020-21 ah vawi 11 an chak zawn tawh record an la tluk lo.
German Bundesliga
Bayern Munich tan Harry Kane a vul chhunzawm zel. England captain Kane hian Inrinni zanah 8-1 ngawta Mainz 05 an sawp tumin hattrick a siam. Mainz laka hattrick a siam hi season kal meka hattrick vawi li a siamna a ni a, German Bundesliga season hmasa berah hattrick siam vawi li siam thei hmasa ber niin, record thar a siam. Kane hian Bayern tan goal 30 a thun tling der tawh a, Bayern tan season khata goal thun hnem ber record siam theihna hun tha tak a nei mek bawk.
Table-a hmahruai mektu Bayer Leverkusen an khel tha chhunzawm zel a, Pathianni zan khan si hnih faiin VfL Wolfsburg an hneh. Xabi Alonso team te hi Bundesliga season kal mekah khelh 25 chhung zet tlawm nei lovin an kal tluang tawh a, Bundesliga-ah tlawm nei lova kal tluang rei pahnihna an niin, khelh 28 chhung tlawm nei lova kal tluang Bayern Munich record an um mek. Leverkusen hi inelna hrang hrang an khelh hnuhnung vawi 36 ah tlawm an nei lova, vawi 31 an chak a, draw vawi 5 an nei. Europe top 5 league season liam ta vawi 60 zet chhungin tlawm nei lova kal tluang rei pathumna an ni.
Major League Soccer season thara goal thun tluang tak Lionel Messi chu CF Montreal an hmachhawn tumin hahdamtir a ni a, Messi tel lova CF Montreal an hmachhawn tum hian 3-2 in an tlawm a, hei hi season tharah an vawi khat tlawmna a ni nghe nghe.
Saudi Arabia lamah Cristiano Ronaldo khelhna Al Nassr an khel chhe zawn a, an khelh hnuhnung vawi thumah hnehna an chang thei lo zawn tawh a. Al Nassr hi hmahruaitu Al Hilal lakah point 9 zetin an hniam tawh zawk.
Kar tawp football hnuhma langsar
