Australian khawpui Melbourne a lockdown khauh tak chu kar hnih atan pawhsei a nih thu official-te chuan an sawi a. Hei hi Covid-19 case tlakhniam chuan loh vang a ni.
Victoria State Premier Daniel Andrews chuan 28 September thlengin tlema phelh thawl hlekin khuahkhirhna khauh taka kalpui a nih tur thu a sawi a. October thla atangin a tahtawlin khuahkhirhna phelh tan a nih tur thu a sawi bawk.
Victoria state hi Australia-a virus epicentre ber niin virus thawh hnihna leng mekah Australia-a nunna chan 753 a 90% chu he state chhunga mite an ni.
Australia mipui maktaduai 25 zingah mi 26,000 in Covid-19 an kai tawh a ni.
Melbourne leh a chhehvelah hian 9 July khan lockdown thawh hnihna an luh hnuah Covid-19 kai punna a nasa hle a. Km 5 huam chhungah zin veivah khap niin zan lam curfew puan a ni bawk a, sumdawnna hmun leh dawrte khar a ni bawk a. Tuna lockdown stage 4 na hi 13 September a tawp tura ruahman zawk a ni a, pawhsei a ni ta a ni.
Melbourne khawpuiah zan lam curfew chu dar 9 atanga zing dar 5 a ni dawn a. Mi mal angin pakhat te tea intlawh erawh phal niin, “Duhthlan tur pakhat chauh kan neia chu chu tuna kan kal dan hi a ni. Tuna lockdown hi an zawm tha lo a nih chuan lockdown in kan awm leh dawn a ni” tiin Andrews chuan a sawi a.
“Tun dinhmunah chuan inhawng zau thei kan ni lo. Kan inhawng zau a nih chuan kan thunun phak bakin a awm mai dawn a. Krismas hnai tawh takah thil a pangngai thei ang bera a awm ka duh a, chu mi tur chuan tuna kan hmalakna hi kan duhthlan theih chhun a ni” tiin a sawi.
28 September thlenga ni tina Covid-19 kai average 30 atanga 50 inkar a nih chuan Melbourne khawpui chuan khuahkhirhna stage 3 ah an awm tawh tur thu a sawi a. Hetah hi chuan mi panga punkhawm rem tih a ni tawh dawn a, school te pawh hawn ngam a nih tawh beisei a ni.
26 October thlenga ni tina virus kai panga aia hniama an awm a nih chuan curfew tihtawp a ni zui tawh bawk ang.
Melbourne khawpui pawn Victoria state hmun dangah chuan lockdown te phelh thawl a ni tawh thung hret dawn a ni.
September ni 13 atangin chhungkaw hnih atangin mi panga te an awm khawm phal a ni tawh dawn a. Outdoor pool leh playground te hawn ni tawh dawnin pawna religious service te pawh mi panga chin awmin kalpui remtih a ni tawh ang.
Hetihlai hian lockdown duh lova kawngzawhna nei mi 300 chuang man an ni a.
“Lockdown duh lohna lantir hi mahni hmasialna a ni a. Mipui ten pandemic reh tawh se an duh a, kei pawhin ka duh a ni” tiin Andrews chuan a sawi bawk.
(THE AIZAWL POST – Rampawn)
Full>> ePaper Subscribe
