Karnataka-a Congress MLA 30 vel chuan New Delhi-a an party hruaitu lawkte pisaah Rahul Gandhi-a hmua minister an nih ve theihna kawng hawnsak turin an beisei a, hruaitute hian Chief Minister Siddaramaiah-a chu state cabinet siksawk tura nawr turin an kar dawn a ni.
March thlaa zanriah eikhawma thutkhawm a awm hnua tih a ni a, tun hnaia by-election neih zawha insiksawi tura ngenna nasa tak karah legislator-te hian an thil phut chungchang an sawiho a ni.
Thawhtanni khan party hotu lawkte hi hmu tura ruahman a ni a, Congress MLA Belur Gopalakrishna chuan a hmain an lo inrawn fo tawh tih sawiin ministry-a hun remchang siamsak tura nawr an rel tih a sawi.
“Hruaitute hi vawi thum, vawi li, vawi nga thlenga hun tha pek tawh an awm a, la awm lote chu hun remchang pek an nih theih nan kan ngen dawn a ni,” a ti a, an tlawhnaah hian minister an nih theihna tur chauh a ngaih pawimawh thu a sawi bawk.
Hetiang bawk hian MLA dang, Ashok Pattan-a pawhin sawiin an hmalakna hian an hruaitute nawrna a lantir tih a sawi.
“Thil phut pakhat chauh a awm – cabinet hi a rang thei ang bera siam danglam a, keini ang member hlunte pawh hun remchang pek kan ngen a ni,” a ti a. Pattan-a chuan Siddaramaiah-a’n a hma kum hnihah mi dangte awmtir an nih tur thu a lo sawi tawh a, kum thum dawn a liam tawh tih a sawi.
MLA rual hian AICC President Mallikarjun Kharge-a pawh hmuh an tum thu a sawi a, hruaitu hlun dang – KC Venugopal, Randeep Surjewala leh Gandhi te pawh hmuh an tum dawn tih sawiin, an awm dan azirin an bei dawn tih a sawi bawk.
Pattan-a chuan, “Hruaitu lawkte thutlukna siam tur a ni a, kan thil phutah hian thil buaithlak engmah a awm lo,” a ti.
MLA-te hian cabinet siksawia huam zau zawk chanvo tam zawk, 25 vel siam an duh thu an sawi bawk a. Hruaitu eng emaw zatin minister hna vawi tam tak an chelh tawh a, hmel thar tan hmun a la awm lo niin an sawi.
An tlawhna hian cabinet tihlen piah lam thil dang engmah phut an nei lo tih sawiin MLA-te hian an hruaitute chu an thil phut, an tum leh duh dan hrilha a huhova pan an nih thu an sawi.
Karnataka Cong MLA-ten minister nih phutin Delhi pan
