Centre chuan Bihar Chief Minister hlui thi tawh Karpoori Thakur chu India chawimawina sang ber Bharat Ratna dawng turin a thlang a. Bihar-a opposition leader-te chuan lawmawm an tih thu sawiin hun rei tak an ngiat tawh a nih thu leh chutihrual chuan BJP-te chu vote duhna avanga leader ropui tak chu hralh tumah an puh thung.
Bihar mipuite ngainat leh ngaihsan em em Thakur, ‘Jannayak’ tia hriat lar bawk kha OBC politics sulsutu ber niin India chawimawina sang ber dawngtu 49-na chiah a ni dawn ta a ni. Bharat Ratna pek hnuhnun ber chu president hlui Pranab Mukherjee kha niin kum 2019 khan hlan a ni.
Thakur hnena Bharat Ratna pek a nih puan rualin Prime Minister Narendra Modi chuan a ngaihsan thu a ziak lang nghal a. Prime Minister chuan backward classes a nih angin ‘Jannayak’ lakah lawmthu sawi sen loh a bat thu a sawi.
Bihar Chief Minister Nitish Kumar pawhin lawmawm a tih thu sawiin Prime Minister hnenah lawmthu a sawi bawk a. Hlimna hun a nih thu leh backward community te tana chanchin lawmawm a ti a. Kumar chuan Kapoori Thakur tana Bharat Ratna chu hun rei tak an ngiat tawh a nih thu a sawi bawk.
Chief Minister hlui leh Rashtriya Janata Dal patriarch Lalu Prasad Yadav pawh Thakur chuan hmana hmanah Bharat Ratna dawng tawh tur a ni a ti a. “House atangin kawtthler thlengin kan ngiatna kan lantir tawh a. Mahse, Central sorkar chu Bihar sorkarin caste census kan kalpui avanga Bahujan-te tana reservation kan tum mek laiin a thangharh a ni. Politics hian Dalit Bahujan-te a ngaihsak tur a ni” tiin a sawi.
Yadav fapa leh Bihar Deputy Chief Minister Tejashwi Yadav pawhin Centre chuan RJD-JDU sorkarin caste survey a neiha result a tihchhuah hnuah thutlukna a siam chauh a ti bawk.
Bharat Ratna pek chhuah hun chu Lok Sabha inthlan hma lawk a nia tia zawhna chhangin Tejashwi Yadav chuan, “A hun chu eng pawh ni rawh se, kan ngiat kan hlawhtling a ni. He thil hi kan bei rei tawh a, socialist leader tin tena an nawr a ni” tiin a sawi.
Opposition leader-te chu chhang letin Union Minister leh firebrand BJP leader Giriraj Singh chuan Nitish Kumar leh Lalu Ydav te chu vote hui nana Karpoori Thakur legacy hralhah a puh ve thung.
“Nitish Kumar leh Lalu Yadav te hian Congress malchungah kum tam chet an la a ni. Eng vangin nge an demand te an neih theih loh? Congress sorkar chuan Gandhi family tih loh tu dangmah a chawimawi ngai lo, Sardar Patel emaw BR Ambedkar pawh ni se. Modiji chuan tunah Ram Temple a ‘pran pratishtha’ hmangin Sanatan Dharma a tharthawh leh a, backward class te zahna lantir nan Karpoori Thakur a chawimawi a ni” tiin a sawi.
“Karpoori Thakur-an he chawimawina a dawn chhan hi Nitish Kumar demand vang a ni lo, Narendra Modi vang zawk a ni” tiin a sawi.
Ravi Shankar Prasad, Bihar atanga BJP leader chuan ‘Jan Nayak’ a chawimawi avangin Prime Minister lawmthu hrilh bawkin, “Sorkar hmasa te khan anmahni leh anmahni hnaihtute chauh an ngaihsak thin. A thente phei chuan an chhungkua te chauh an ngaihsak a. Narendra Modi sorkar thung chuan ram pum a ngaihtuah a ni. Kan elpui an ni mai thei e, mahse, ram tana thil tha a tih chuan chawimawi a ni ang” tiin a sawi.
Karpoori Thakur kha kum 1924 ah piangin backward section chhuak niin naupangte niin independence movement a zawm a, lung in pawh a tang nghe nghe a ni. A hnuah erawh socialist leader turu tak ni chho zuiin Bihar Chief Minister tum hnih lai a ni zui a. Marginalised section te tana thawkrim em em leh ngaihsan hlawh em em a ni. Kum 1988 khan Chief Minister term hnihna a chelh mek laiin a thi.
Karpoori Thakur hnenah Bharat Ratna
