US Secretary of State Marco Rubio-a chuan Inrinni atang hian ni li chhung India a tlawh dawn a, hei hi ram pahnih inkara sumdawnna, ralthuam leh energy lama thawhhona tha zawk a awm theih nan a hmang dawn a ni.
US Department of State chuan Rubio-a hian Kolkata, Agrata, Jaipur leh New Delhi te a tlawh dawn tih a puang.
State Department thupuangtu, Tommy Pigott-a chuan, “Secretary Rubio hi May 23-26 chhung hian India-ah a zin dawn a. Kolkata, Agra, Jaipur, leh New Delhi a tlawh dawn a ni,” a ti.
Secretary hian Indian thuneitu sangte a kawmnaah energy, venhimna, sumdawnna leh ram himna lama thawhhona chungchang a sawipui dawn tih Pigott-a chuan a sawi.
Rubio-a hian Sweden atlawh hmasain India a pan dawn a, Scandinavian ramah hian May 22-a NATO Foreign Ministers meeting-ah a tel dawn a ni.
India chuan karleh hian Quad foreign minister-te meeting a buatsaih dawn a, he meeting-ah hian khawvel pum huapa harsatna lian tham tak tak, Asia khawthlanga buaina avanga harsatna awmte pawh an ngaihtuah rin a ni.
New Delhi-a thutkhawm hi Thawhlehnia neih tura ruahman a ni a. Rubio, Australian Foreign Minister Penny Wong leh Japan Foreign Minister Motegi Toshimitsu te tel tura ngaih a ni a, Indian External Affairs Minister S Jaishankar-a’n a kaihruai ang.
Kartawpah US Secretary of State Rubio-a’n India tlawh dawn
