Katy Perry leh Justin Trudeau an ri ta rût rût!
Nimin lawkah Canadian Prime Minister hlui Justin Trudeau leh pop star Katy Perry te zanriah ei dun thu kan rawn tarlang a, an inkarah ei deuh rêt rêt a ni awm a ni lo’ng maw, kan tih rilruk kha a ri ta rût rût a nih hmel riau, Trudeau hi Katy Perry concert-naah mipui zingah an hmu fuh leh ta tlat!
Katy Perry hian Lifetimes Tour a neih mekah tunlai hian Canada-ah hun a hmang mek a, Trudeau nen hian restaurant a zanriah an ei dun hnu lawkah, Montreal-a Katy Perry concert-naa VIP section-ah Trudeau hian nuamti taka concert boruak a chhim lai fans lamin an hmuh hmaih lo nasa mai a, anni pahnih hi an relationship status a ‘single’ tih dah thei ve ve an ni bawk a, an inkarah hian boruak romantic deuh hlek a awm a nih rinna a rawn tilian lehzual ta a ni.
A hma lawkin Trudeau leh Katy Perry te hi Mount Royal Park-ah an teihawi dun lai an lo hmu fuh tawh a, hemi ni hian restaurant changkang Taverne Atlantic-ah zanriah an ei dun zui a, tunah Katy Perry concert-naah Trudeau a inlan leh tak zel avang hian “A chiang tawk e,” ti pawl pawh an kat ta nuk e.
Katy Perry hi actor Orlando Bloom nen kum 10 dawn an inzui tawh a, fanu Daisy Dove an nei tawh a, mahse, June thla khan an inhualna an tihtawp thu an puang a, Trudeau pawh hi a nupui Sophie Gregoire Trudeau nen kum 18 an inneih hnuah August 2023 khan an inthen tawh bawk.
Katy Perry leh Justin Trudeau an ri ta rût rût!
