Environment Department of Balearic Islands chuan Katy Perry music video thar ‘Lifetimes’ chuan S’Espalmador tiau vut hmunah environment tihchhiat a nei em tih an chhui dawn tih an puang. S’Espalmador hi Balearic Islands, Spain-a ecology lama hmun hausa tak mai a ni a, Katy Perry music video tharah hian helai hmun hi tihlan a ni.
Environment Department chuan helai hmuna music video siam turin Katy Perry music video buaipuitute hian phalna an la mumal lo niin an tarlang a, Dr. Luke produce ‘Lifetimes’ music video-ah hian Katy Perry hi Ibiza leh Formentera-ah te a inthehthil a, tuipui kamah hun hmangin, zan lamah nigt club te a hrut kual leh a ni.
Environment Department chuan music video scene pakhatah chuan luhchhuah phal lohna hmun tih entirna hrui thlun awm chungin S’Espalmador tiau vut-ah Katy Perry hi a che vel lai a lang niin an tarlang a, dilna mumal taka thlen hmasak chuan helai hmunah hian video siam hi phalsak theih an nih laiin, Katy Perry production team hian an dil hmasa lo a, chu chu dan palzutna a ni an ti.
Katy Perry hi American Idol judge niin, rimawi khawvelah hla thar nei lovin a thawm a reh reng a, tunah Idol judge bansanin, rimawi lamah a insawrbing leh tawh a, September ni 20-ah a album thar ‘143’ tlangzarh a tum a, hei hi 2020-a a album ‘Smile’ hnua album a tlangzarh leh hmasak ber tur a ni. ‘Lifetimes’ pawh hi he album thar tur atanga a single niin, he album-a a hla dang ‘Woman’s World’ pawh a lo tichhuak tawh bawk.
Katy Perry ‘Lifetimes’ music video an chhui dawn
