Site icon The Aizawl Post

Kawlphetha hman man 3% veka pun rawt

Mizoram leh Manipur enkawltu, kawlphetha hman man (electric bill) tur bithliahtu Joint Electricity Regulatory Commission (JERC) hnenah Mizoram sorkara power & electricity department-in kawlphetha hman man hi 2023-24-ah chuan 3.15%-in pung se tiin an rawt.
JERC hotute sawi danin, power & electricity department hian kumin January ni 18 khan kawlphetha hman man tihsan rawtna hi JERC-ah an thehlut a, department-in sorkar kum thar 2023-24 atana eng chhit man tihsan a rawtna chu tuna hmanlai mek atanga chhutin zaa 3.15 a ni.
An rawtna anga tihsan a nih chuan ‘subsidise’ hnuah unit khat Rs 8.08 a ni dawn a, tuna tariff hman lai mekah hi chuan eng chhit man hi unit 1 man hi Rs 7.83 a ni.
JERC hotute chuan kawlphetha chhit man hi kum aennawn thin a ni tih an sawi a, sorkarin rawtna a thlen chungchang sawihona hun (public hearing) an buatsaih thin thu te, tariff ennawn chungchanga sawiselna leh rawtna awmte thlir chungin tariff thar an siam thin tih te an sawi. Tun tumah pawh hian kawlphetha hman man ennawn tura rawtna lut chungchang hi March ni 22-ah Aijal Club-ah sawiho a ni leh dawn tih an sawi.
Mizoram sorkar chuan nikum 2022 khan sorkar kum kal mek 2022-2023 chhunga kawlphetha man hman atan, zaa 21.05-a tihsan a rawt a, mahse 6.78%-in a pung ta zawk a ni.

Exit mobile version