Kawnpui leh Khamrang inkara kawng chhe zualpui chu thawmtha zo thawkhatah PWD lam chu an inngai a, khua in a bumro thar leh a nih loh chuan lirthei tana zawh harsa zual a tul anga thawmthat zel an tum tih an sawi.
National Highway 06 (NH 06) Kawnpui leh Khamrang inkar kawng chhia thawmthat hna thawh mek tlawhin Public Works Department minister Vanlalhlana leh Food, Civil Supplies & Consumer Affairs minister B Lalchhanzova te chuan Inrinni khan an enfiah a. PWD minister hian September 18 khan a lo tlawh tawh bawk.
“Tuna sawrkarin kawng chhia a thuamthat mek hi a chhe zualpui siamthatna chauh a la ni a, furlai a nih avangin duhthusama siam theih a la ni rih lo. Ei leh bar leh nitin mamawh a lo luh theihna tur kan ngaihtuah ber rih a, Supply minister nen helai hmuna kawng siam hna dinhmun kan endun a, hun a lo kal anga, tha zawk leh mawihnai zawkin sawrkarin kawngpui hi a thuamtha zel dawn a ni,” a ti.
Kum dang zawng aiin kuminah ruahtui a tla tam a, chu chuan Mizoram hmun hrang hrang kawngpui a tichhe nasa hle a, hmun 573 velah kawngpui hnawha leimin a awm tih PWD minister hian a sawi. NH-6 pawh nasa takin a tichhia a, helai kawngpui hi ei leh bar chawkluhna ber a nih avangin mipui nunphung a tikhaihlak a, Mizoram sawrkarin mawhphurhna la in theihtawpin kawng siam hna a thawk a, mipui pawhin sawrkar hmalaknaah tha thawhin, Central YMA, NGO hrang hrang, Truck Owner Association, Truck Driver Association, Comercial Vehicle Owner Association, Kolasib DC leh kan Police bakah khawtlang hruaitute fakawm a tih thu a sawi a ni.
FCS&CA minister pawhin tun dinhmunah Aizawl pana tank lorry an kal mek thu leh Silchar lamah pawh an dawh mek thu a sawi a. Inrinni tlai leh Pathianni lamahte khuain a bumro a nih loh chuan oil leh nitin mamawh phur dangte a rawn thlen belh zel beisei a ni tih a sawi a ni.
Kawng thawmthat hna kalpui meka hmasawnna thlen chinte ngaihtuah a nih hnuin September 21 tlai dar 5.30 atangin nitin mamawh bungrua (essential commodities) phur lirtheite chu kaltlang tir an ni a. Hetih rual hian kawngpui vilzui leh thawmthat hna pawh boruak awm dan thlir chunga thawh zel tum a ni.
September 18 khan PWD minister leh deputy speaker-te chuan he kawng hi zawhin hmalakna an lo enfiah tawh a; hemi ni hian ruahmanna thar siam niin lirthei tangkhangte chhuah tir an ni. Ngawrh zawka kawng siam a nih theih nan lirthei paltlang turte dangin September 19 atanga September 21 thlengin kawng thawmthat hna PWD-in team 4-ah inthenin excavator leh road roller leh hlawhfa tam zawk ruaiin a siam a. September 20 zan atang khan Silchar lam pan tur lirtheite chhuah an ni a, September 21 tlai atangin Aizawl pan bungraw phur lirtheite chhuah ve leh an ni thung.
NH 06 Kawnpui- Khamrang huamchhung km 122- 123 inkarah kawng thawmthat ngai zual 2/3 vel awmin, km 124-126 inkarah 5/6 leh km 129-132 inkarah 4/5 vel awmin a zualpui zawhfel tawh a ni a; ngun taka vilzui zel a ni dawn a, lirthei tana zawh harsa laite a tul anga thawmthat zel tum a ni.
Kawng chhe zual hnawh zoah PWD inngai
