Kolasib district-a national highway chhe lutuk chu siamthat ran phutin lirthei neitu leh a khalhtu pawl chuan Mizoram chak lakna ber, Kolasib paltlang Bairabi leh Vairengte atanga Kawnpui inkar kawngpuia lirthei tlan tur chu Ningani chawhma dar 10.00 atang khan an dang a, zawm a hlawh tha nia sawi a ni.Thudawn danin, kawngpui dan huaihawttu hi Kolasib district-a lirthei neitu leh a khalhtu pawl panga intelkhawm an ni a.
Kawngpui dan avang hian buaina liantham chhuak a awm loa, Vairengte, Saiphai, Rengtekawn (Bairabi kawng peng), Bualpui North leh Kawnpui Serkhan pengah an duty a ni. Kawngpui dan huamchhunga khaw hrang hrangah nunphung a pangngai a; zirna in, sawrkar pisa, bank, damdawi in leh bazar pawh dan pangngaia hawn vek a ni.
Kawng dan chhan hi, Bairabi to Kolasib bakah Vairengte – Kolasib – Kawnpui national highway chhe lutuk chuan nitin nunphung a tibuai a, mipui, zirlai, sumdawng leh lirthei neitu leh khalhtu tan harsatna nasa tak siamin, hemi pumpelh tur hian fur intan hma daih atangin hma an lo la tawh chungin, ngaihpawimawh a hlawh tawk loa, fur ruahtui tlak tam hnu ah harsatna an tawk nasa zual a, loh theih lohin kawngpui dan hmanga hma an lak hi a ngai ta tih an sawi a ni.
Ningani khan Kolasib district bawrhsap Robert C Lalhmangaiha chuan kawngpui tha neih a nihna tura district thuneitute hmalak dan leh kawng dan tumtute ti lo tura an ngen dan chu Kolasib-a thuthar thehdarhtute hnenah a sawifiah a. Hemi hnu hian kawng danna hmun hi an tlawh ho a ni.
Thudawn danin, kawng dangtu lirtheia eizawngtu pawl leh Kolasib district bialtu MLA Lalfamkima te chu nizan khan an inbe leh dawn nia hriat a ni.
Kawng chhia siam ran phutin Mizoram chak lakluhna dang
