Kawng chhia vanga harsatna a zia hret

Chawlhkar tharah kawng chhia vanga harsatna a zia hret a, ni tin mamawh thil thenkhat a thleng tha ta deuh.
Kar hmasa Zirtawpni zan atang khan Mizorama bungraw phur luttu lirthei an tlan tan a, Thawhtanni-ah chuan bungraw lak tur a awm ta nual.
Thla khat vel a thlen loh hnuah amul gold a thleng a, hun engemaw chen bawnghnute a van hnuah chawlhkar tharah chuan lei tur a awm ta. Thawhtan tukah amul gold laluttute hnena la turi dawrkai an intlar a, a laluttute hian dawrkai hrang hrangte hnenah hian an lo sem rual.
Thil thleng thar langsar tak pakhat chu chips a ni a, hun engemaw chen a thlen tawh loh hnuah lay’s leh chip chi dang thenkhat a thleng. Hei pawh hi dawrkaite’n an la zo nghal tih thu dawn a ni.
Hun engemaw chen thleng tawh loah tel a la thleng lo a, a lar ber best choice leh soyam a la thleng lo. Mahse tel hi chu tlang kawngah tlem tlema la an awm avangin amul gold anga vang a ni lo. Amaherhawhcu, dawrkaite’n an lakna a to thung a, Rs 940-a an lak thin kha Rs 970-in an la thin.
Tuialhthei pawh a thleng a, filling station thenkhat chuan nilengin duh zat zat lak theih (free sale) an ti.
August ni 9 leh ni 10-ahte ruah a sur loh bakah ni 11-ah pawh chawhnu lam thlengin ruah a sur lo a, Vairengte lam atanga Aizawl pan tur lirtheite pawh pangngai takin an tlan thei rih. Mahse an thang rei a, traffic a jam bakah kawng siam avanga lirthei indintir zeuh zeuh a awm thin.
Mizoram Truck Drivers Association hruaitute chuan a chhuak lam pawh an thang rei thu an sawi a, an thang rei avang hian bungrua hi a thleng zung zung thei rih lo tih an sawi. Kawnpui thlang lamah lirthei ding, intlar an awm rih lo tih an sawi a, Kawnpui leh Khamrang inkarah erawh ding ni lovin traffic a jam avanga ding an awm reng thu an sawi.
Tun hnaia kawng siam an rap chhe leh nghal a, mahse a siamtu lamin an siam nghal zel tih an sawi a, a chhe zual zel ang tih a hlauhawm thu leh, ruah a sur a nih chuan chhe leh nghal mai tura ngaih a nih thu te an sawi.