Kawng chhia vanga kawng
dangtu zingah mi 27 an man
Vairengte leh Sairang inkar kawng chhia avanga Kolasib district-a lirtheia eizawngtu pawlten kawngpui dan an tumnaah an member 27 man an ni.
Mizoram Tipper Association District Hqrs Kolasib leh Joint Action Committee Kolasib chuan an lo sawilawk tawh angin Ningani zing dar 7.00 atang khan Kolasib Rengtekawn, Kawnpui leh Serkhanah an dang a; kawng an dan chhan hi National Highway 306/ 06 chhiat rei tawh avang leh siamtha rang tura sawrkar leh NHIDCL an phutna a ni.
Sawrkar chuan dang lo tura a ngen ang leh kawng pawimawh a nih avangin an dang lui a nih chuan kawng titlang tura force a hman tur thu a sawilawk angin, police engemawzat a duty tir a, Kawnpui leh Serkhan bikah chuan an intihbuai lem loh laiin, Rengtekawn-a kawng dangtu zingah mi 27 chu man an ni a, Kolasib Police Station lock up-a dah lailawk niin, he chanchin buatsaih lai hian an awm dan tur hriat a ni lo.
Kawngpui dan tan tirh hian lirthei veivak an tam lem loa, hetianga an inman hnu hi chuan lirthei tlan vel pawh dan pangngaiin a kal zui thei nghal tih thu dawn a ni.
Kawng chhia vanga kawng dangtu zingah mi 27 an man
