Kawnpui leh Sairang inkar kawngpui chhia avanga mipui tawrhna, a bikin truck driver-te tawrhna a nasa lutuk tiin Joint Civil Society of Mizoram chuan darkar 48 chhunga siamtha turin helai kawng enkawltu NHIDCL an phut.
Joint Civil Society of Mizoram (JCM) hruaitute chuan he kawng hi July 19 khan an tlawh a, a chhiat dan chu lirthei tan kal theih rual a nih loh laiin, a chhe zual lai erawh km. khat vel chauh a ni a, khuar thuk tamna pawh hmun 6 vel chauh a ni tih an sawi.
Kawngpui tha tak siam nghal an beisei bik loa, lirthei tana tlan hrehawm lo tur leh an chetsual lohna tur tala siam an phut ber a ni tih an sawi a ni.
July 19-a an tlawh lai hian, kawng tluanin hnathawk awm dan an thlithlai a. Excavator pali hna thawk an hmu a, thawktu mihring 5 vel chiah an hmu tih an sawi. Excavator pawh hi a chhe lai siam tur vek ni loin, lirthei tang nawr chhuahna atana dah an awm nia a lan thu an sawi bawk.
Heti taka buaina a awm lai hian, hna kengkawh mektu NHIDCL hian rang taka siam tumna an nei lo em ni aw tih theih a ni tih an sawi a. Concrete kawng awm siam mek chu a la tlem hle a; truck ding ngir khupin kalkawng a tih pin vek avangin Khamrang leh a chhehvel khaw mipuiin harsatna tam tak an tawk tih an sawi a ni.
JCM hian Thawhtanni khan NHIDCL Regional office Aizawlah lehkha pe in, NH 306 & 06 Sairang - Kawnpui hi emergency-in lirthei kal theih loh lai siam turin an thlen a. Hna an thawh tanna atan darkar 48 chhung hun an pe.
Hemi ral hnu hian an hnathawh dan July 24-ah a hmunah en leh an tum tih an sawi a. Kawng hi siamthat a nih loh chuan July 26 (Inrinni) hian ‘Zoram Hnatlang’ koh nise an ti.