“Kawng a chhiat hian keini chuan chawp leh chilhin kan tuar nghal a, kan chhungkaw khawsak a nghawng nghal. Lirthei hmanga eizawngte chu chutiang chu kan ni vek ang,” tiin truck neitu pakhat chuan a sawi a, mipui a nghawng hmain lirthei hmanga eizawngte hi a nghawng thin tih a sawi.
Mizoram kawng a chhiat em avangin an chhungkaw khawsak a nghawng a, loan rulhna tur pawh an tlan chhuak zo lo a, hah taka thawk chungin an tlahniam mek tih a sawi.
A sawi danin, kawng tha pangngaiah chuan thal laiin thla khatah cheng nuai 1.4 te a phur chhuak thei a, chuta tang chuan loan a rulh bakah lirthei enkawlna tur sum a la dah hrang thei bawk. Tunah chuan thla khatah Rs 60000 te a tlan chhuak a, chhungkaw ei khawp pawh a awm lo.
“Thla khatah Rs 60000 hlawh theih chang ka nei a, truck ke hi pakhat Rs 23000 man te a ni a, kawng a chhiat em avangin a ke hi kan thlak mawlh mawlh a ni ber a. A part dang man leh a siam man te kan paih hian, loan rulhna tur khawp hi a bang a awm ta thin lo a,” tiin an dinhmun a sawi.
“Tlanna tur hre pawl tak ka nih ka ring a, a vannei pawl ka nih ka ring. Kei aia hlawh tlem hi an tam a, an khawngaihthlak ve leh chhawng khawp mai,” tiin a chhunzawm a ni.
Mizoram Truck Owners Association hruaitute pawhin lirthei enkawl a hautak thu hi an sawi a, kawngah an thang rei a, truck a tluk loh pawhin kawng chhiaa tlan na na na chu siam ngai hi a awm deuh reng tih te, a insawh nasat bakah kawng chhiaah a inelh nasat avangin a spring leh a differential te a lo inelh nasa a, siam leh thlak a ngai reng a, a ke thlak a lo ngai ngun bawk a, sum senso a hautak hle tih an sawi.
Mipuiin an tuar ang tih an hlauh avangin kawng chhiaah pawh an tlan hram hram a, tlawmngaih chhuaha tlanah an inngai ve tih te, hetia kawng chhiaa an tlan hian sum leh pai lamah chhungkaw khawsak a nghawng a, chuti chung chuan a nuar zawnga kal loh te, lungawi lo nih loh te an tum hram hram tih te an sawi bawk.
Mizoram hmun hrang hrangah kawng a chhia a, ni tin mamawh thil lakluhna kawnga tlan, lirthei hmanga eizawngte chu a nghawng vek ang tiin an sawi.
Kawng chhiain chhungkua nghawng
