Vairengte leh Sairang inkar kawngpui a chhiat avanga lungawi lova ni hnih an din hnuah truck an tlan leh dawn a, Zirtawpni zan khan an nawrh an titawp.“Kawng chhiat avanga Dt 23.01.2025 zing dar 7.00 atanga Mizoram chhunga truck kan ding chu sorkarin hma a la a, Kawnpui leh Khamrang inkara kawng chhe zual, tluk hlauhawm zualte hnawh a nih tak avang te, kawng an la siam that zel dawn avang te leh, PWD hnathawh dan tur ruahmanna fel fai zawk a awm tak avangin Dt.24.01.2025 tlai dar 6.30 hian kan tlan leh thei ta tih kan puang e,” tiin Mizoram Truck Owners Association (MTOA) chuan Zirtawp zan tirah khan thuchhuah an siam.
“Kan din chhunga min thlawptu lirthei pawl hrang hrang leh, tlawmngaia duty-te chungah kan lawm a, kan din chhunga harsatna tawk mipuite chungah hriatthiamna kan dil e,” an ti bawk.
Nawrh hi MTOA leh Mizoram Truck Drivers Association (MTDA) te’n an huaihawt a, Mizoramin bungrua leh ni tin mamawh thil a lakluhna kawngpui pawimawh, Vairengte leh Sairang inkar kawng a chhiat em avangin, lirthei leh a enkawltute tan pawh a him lo tiin Ningani tuk atang khan tiam chin awm lovin an ding a ni.
Zirtawpni khan home secretary office-ah home department hotute leh PWD hotute nen MTOA hruaitute an inbia a, chumi hnuah an inbiaknate thlirin MTOA hruaitute leh MTDA hruaitute an thukhawm leh a, tlan leh ni se tiin an rel ta a ni.
January ni 31-ah MTOA leh MTDA hruaitute hian PWD minister hovin kawngpui hi enho an tum a, PWD minister pawhin hei hi a pawm tawh.
Nawrh huaihawttute chuan an din chhungin tlan lui emaw ngen viau ngai emaw an awm lo a, lungrual takin an ding tih an sawi. A ni hnihnaah hian Kawnpui bulah chuan truck 200 chuang a ding hman.
Kawng chhiat vanga ding truck tlan leh dawn
