Sawrkar kum kal meka road maintenance fund atana dah cheng nuai 1769.17 chu hman zawh a ni tawh. Assembly Session-a Congress member C Ngunlianchunga zawhna chhangin PWD minister Vanlalhlana chuan road maintenance fund atana dah hi cheng nuai 1769.17 a ni a, hman tawh zat chu nuai 1769.17 a ni.
PWD chuan kawng km. khat zelah a thawmthatna atan Rs. 49300 hman tur angin a chhut lawk a, kawng specification azir leh kawng chhiat /that dan azirin km khat zela sum hman hi a danglam hle tih a sawi.
Kawngpui tichhe thei laka venghim turin PWD chuan Road Protection Squad a nei a, kawngpui tichhe thei zawnga thildang atana kawng hmangtu an awm leh awm loh an endik tih PWD minister hian a sawi a. Chutihlaiin hremna lekkawh turin dan tlawhchhan theih an nei lo thung tih a sawi.
House leader, chief minister Lalduhoma chuan an sawrkar hnu ah kawng siam dan kalphung thar, ‘bitumen concrete’ hman a ni tih a sawi a. Paver khawl kal theih lohnaah chuan kalphung hluia kawng siam a la ngai tih a sawi.
Sawrkar laipui hnenah Mizorama kawngpui zawng zawng, state PWD enkawl bakah BRO leh NHIDCL enkawl pawh, ‘rigid pavement’ (cement concrete slab/panel) veka tih turin Union Transport minister an dil a, DO letter pawh an inthawn tawn zak zak reng a, a senso a hautak deuh dawn naa, a daih rei dawn a, kum 10-15, kum 20 thleng pawh a daih thei tih a sawi. Tuna estimate awmsa erawh a nga anga siam ala ngai dawn tih a sawi bawk.
Kawng enkawlna atana sum ruahman sa hmang zo tawh
