Kawng laih leivung nghawng PHE tui lakna a lak tlak loh

National highway kawng laih thara lei vungte lui lama nawr liam a tam vang nia ngaih theihin Mizorama lui lian zual thenkhat chu a nu reng a, tunhnaia ruahtui tlak avangin lui tui nu hian zual lam panin, mipui in tura tui laa thlifimtu Public Health Engineering Department lamin harsatna an tawk chho tan mek. Aizawl khawpui chawmtu Tlawng lui chu tui tlem vanga tui lak tur a awm tam loh reng hnu ah, tunhnaia ruah surah tui hi tam tawh mah se, a nut avangin mipui pekchhawn tura lak leh thlitfim kawngah PHE department chuan harsatna a tawk zui leh mek.
Tun dinhmunah tui hi ti fim thei rih mah se, sawngbawl a ngai nasa a, tui a nut chhoh zel phei chuan tih fim a harsa tulh tulh thei dawn tih Aizawl Water Transmission Division lam hotute chuan an sawi.
Saitual leh a chhehvel khua chu tunhnaiah lui tui nu tuar nasa ber an ni a. PHE tui lakna ber Tuivawl a nut nasat avangin thla khat vel chu mumalin tui an pump thei tawh lo nia sawi a ni. Gravity-a tui lakna, Tawi leh hmundangah nei ve bawk mah se, ruahtui tlak hma kha chuan tui a kang a, mipui chawmtu ber Tuivawl lui a nut reng avang hian PHED lamin duh anga tam tui an thlifim thei loa, mipui nawlpui tan thla khat vel chu tui an sem mumal thei tawh lo tih The Aizawl Post chuan thu a dawng.
Ruahtui khawlna nei tha deuh chu an buai dan a nep deuh a, chutiang nei ve lo chuan private-a tui chawite atangin tui hi an la ber niin thudawnna chuan a sawi. Litre 1000-ah Rs. 700 vel la in, an tui lakna hi kawng laih leivungin a tih buai ve loh, Saitual atangin km.8 vela hla niin, “Tunlai chu private-a tui sem ho an insulpel zut zut reng mai,” thulakna chuan a ti. Tuivawl hi a nu a ni mai loa, PHE tui lakna turah phei hi chuan a kawiin a kawi a ni ber, tiin thudawnna chuan a sawi bawk.
Khawzawl khawpui pawh kawng laih leivung paih tuar nasa zingah a tang a. Tun thleng chuan PHED-in tui hi pump thei mah se, fur ruahtui lak tam hun, tuiin leivung tam zawk a hnawl tel hunah chuan tui pump ngaihna a awm dawn lo tih department lam hian mipui an hrilh lawk. Ruah tui khawl uar turin an hrilh.
Khawzawl hian Tuichang atangin lui tui an la a, kawng laih leivung hi lui hnar lamah a luh nasat avangin tui a tam hunah chuan tui a nu satliah lo anga, chirhdiak a tam dawn tih chu PHED lam hmuh lawk dan a ni a. Hei vang hian Khawzawl mipui chu tui renchem a, ruahtui khawl lam uar turin an chah a ni.
Khawzawl buaina hi hetah hian a tawp mai lo a, Tuichang fintu, Khawzawl daia luang Tuisen lui chu kawng laitu contractor-ten a ral lehlamah kawng an lai a, a ral lehlam dangah lung an la bawk a, an vah vel awlsam zawkna atan leh an hmanrua dahna atan Tuisen lui hi an khuap chat tawp mai niin The Aizawl Post chuan thu a dawng.
Tuichang leh a fintu luitea leivung lut hian tun dinhmunah mipui tana tui laknaah harsatna lian tak la thlen loin lang mah se, fur ruahtui tam huna nasa taka leivung a len tel tur hian an rin phak bakin a nghawng na thei dawn tih thudawnna chuan a sawi a ni.
Tuikum lui atanga khawpui chawmtu tur tui la Serchhip chuan nikum ang em emin tui nu leh leivungin a siam chirhdiak hi kuminah chuan an la tuar na lo niin an sawi a. Nikum lam chuan leilet siamtute bakah mipui chawmtu tui lakna thlengin na takin an tuar a, kuminah chuan la tuar vak rih lo mah se, fur a intan dawn chauh avangin sawilawk a harsa tih an sawi a ni.
Hnahthial lam pawh tui nu hian a tibuai a, tui lakna tibuai khawp erawh a la ni lo nia thu dawn a ni. An ni hian Tuichang lui atangin tui an la a, kar kalta khan tui nu lutuk hian tui pump leh a thlitfim tibuai deuh mah se, a ziaawm leh hret nia sawi a ni.
Mipui hman tura tui lak dan a thianghlim leh thianghlim loh hi Nephelometric Turbidity Unit (NTU) hmanga teh a ni. BIS thliar danah NTU khat (1) hi mihring in tlaka ngaih a ni a, tui dang a awm ngang lo a nih chuan NTU nga (5) thleng pawh pawi loa ngaih a ni. Kar kalta lama Hnahthiala tui lak chhuah hlim chu NTU 608 a ni a, theihtawpa an thlitfim hnu ah NTU 16.59 a la ni.