National HIghway No.54 laih zauh leh siamthat hna thawh mekah Chhiahtlang khawchhunga kawng siam hna thawha harsatna siamsak lo turin mi 9 hrilh an ni.
Thudawn danin, Serchhip district-a NH-54 laih zauh leh siamthat mekah Chhiahtlang khawchhungah hian zangnadawmna la tawh, in la thiat lo mi pakhat a awm a, Roadside Reserved Area-a in leh bungrua dah nei nia insawi mi 8 an awm bawk.
Heng mite dinhnun enfiah leh in leh bungrua a theih ang anga senghawi turin Ningani khan Serchhip bawrhsap office atangin executive magistrate hoin police, NHIDCL leh kawng siam hna thawktu company aiawhte an thawkchhuak a, ram lak dawn avanga zangnadawmna la tawh chunga in la thiat lo pakhat chuan harsatna a tawh thu bawrhsap hnenah thlenin, court-a an kal mek thu leh an chungchang hi ngaihtuah a nih dawn thu a sawi a ni.
Court hian in thiah tum hi a ‘stay’ sak a nih loh chuan chawlh kar khat chhunga thiat tura tih a ni a. Hun tiam a ral hnu ah chuan thiah sak tho a ni dawn tih hrilh a ni.
Kawngpui laih zauhna bula in hmun leh pass nei, laih zauh chinin a huam chiah si loh avanga zangnadawmna hmuh beiseia buaina siam an la awm bawk a, an pass neih pawn lam a nih avangin zangnadawmna pek theih an nih loh dan hrilhfiah an ni. Heng mite hi hnathawh kal mekah buaina siam lo tura hriattir an ni bawk.
Kawng laih tibuai lo turin hrilh
