Sawrkar laipuiin kawngpui sialna tur sum a ruahman sa rengah pawh Mizoram sawrkarin a tih tur a tih fel loh avangin tun thlengin kawng chhia ah kan buai phah tih BJP Mizoram president Vanlalhmuaka chuan a sawi.
Thawhtannia an office-a inkhawmah BJP State president chuan, Lengpui Airport siamna tur sum chu pek ni tawhin, hmasawnna erawh a kal muang hle a; four lane kawngpui pawh central hmalakna niin, sum awmsa reng ni mah se, vawiin thlenga kawng tha kan neih theih loh chhan chu state sawrkarin kawng siamna atan a tih tur a tihfel loh vang a ni tih a sawi.
“Sawrkar hian ram hmasawnna aia ngaihpawimawh dang a nei thin a, compensation buaiin kan buai luih luih a, vawiin thlengin Vairengte leh Aizawl inkar kawng chhiat vangin kan buai phah. Aizawl khawpui tawt lutuk leh traffic jam nasa tih ziaawmna atan Aizawl by-pass road siamna tur central-in cheng vaibelchhe 500 min pe a, hna thawh theih a la ni lo hi a buaithlak hle,” Vanlalhmuaka hian a ti.
Mipuiin thil tak tak kan ngaihtuah a ngai tih sawiin, Mizoramin state dang hmasawnna kan hmu a, kan kawtkaia awm tur erawh chuan a ngaihna kan hre loin, mimal anga hlawkna kan tel ve theih dawn loh chuan kan tikhawtlai duh thin nia a lan thu a sawi a ni.
PM scheme, mipuiin kan hman tangkai theihna’n sawrkar laipui hruaitute nen an thutkhawmnaah an sawi a, a bikin MUDRA loan-ah central-in bank hrang hrangah loan pe turin ruahmanna a siam a. State sawrkar pawhin a policy nen kaihkawp tumin Hand Holding Policy-a kaihluh a tum nia lang chu a lawmawm rualin, PM scheme chu PM scheme a nih anga tha taka lo thawhpui a, rem leh rem loa mahni party hamthatna atana hman tum loa, a chhawr tur dik tak, eizawnna bul tan tur tan awlsamna kawng zawnpui se state sawrkar tan achievement ropui tak a ni dawn tih a sawi a ni.
Kawng sialna tur sum awmsa rengah sawrkarin a tih tur ti lo – Vanlalhmuaka
