Kawnpui leh Sairang kawng siamthat zawh hleihtheih loh avangin rang taka siam zawh a nih theihnan lirthei lian hmanga eizawngtu pawl 24 intelkhawm chuan vawiin – August 4 atanga August 9 thleng siam lirthei tlan tir loh an tum a. Hemi chhung vek hian sawrkar leh NHIDCL chuan a si ruk laa kawng siama thawh chhuah tumin an inruahman a, a huamchunga YMA branch pali chuan hnatlangin an thawhpui dawn.
Home minister K Sapdanga chuan Inrinni khan Sairang -Khamrang- Kawnpui inkar kawng (NH-6) siamthat hna kalpui mek chu a hmunah a endik a; adviser to chief minister tBC Lalvenchhunga, bakah PWD leh Police hotuten an tawiawm. Kawnpui leh Khamrang khawtlang hruaitute, truck Owoners leh Driver Association hruaitute nen an inbe bawk.
Home minister chuan Kawnpui leh Sairang inkar kawng tha lo avanga mipui leh lirthei khalhtute harsatna tawh mek chu pawi a tih thu sawiin, harsatnate sutkian a nih thuai theihnan kawng siamthat hna ngawrh taka kalpui mek zel a ni tih a sawi a. Kawng siam hna thawktu NHIDCL leh PWD hmalakna tichak tura khawtlang hruaitute, tlawmngai pawl, lirthei neitute leh lirthei khalhtute inpekna leh tawiawmnaah lawmthu sawiin, kawng chhia avanga Vairengte leh Sairang inkara tangkhang mekte chu a tawrhpui a, an ei leh in tur Kolasib bawrhsap office-in a ngaihtuah zel tur thu a sawi a ni.
Home minister hoa ruahmanna siam dan chuan, August 4-9 chhung hian ngawrh lehzuala kawng siam hna thawh tum a ni a. He ni 5 chhung hian PWD leh NHIDCL in an tha zawng zawng hmangin kawng siam hna an thawk ang. Lirthei tangkhang mekte chu Mizoram Police ruahmanin August 3 (Pathianni) ah chhuahtir vek tur niin, ke 14 nei (14-wheeler) chin chunglam erawh tlan phal a ni rih lo anga, an bungraw phurh pawimawh leh hmanhmawh thlak chu truck te zawka inhlanchhawng tura hrilh an ni.
Thawhtanni atanga Nilaini (August 4-6) inkarah phei chuan lirthei eng chi mah tlan phal a ni dawn loa, hetih chhung hian Kawnpui atanga Aizawl panna, Durtlang kawng chu LMV tan tlan hun bituk a awm hranlo anga, chutihrualin 407 truck chin tan zan dar 10.00 atang zing dar 5.00 thleng tlan theiha hawn sak an ni ang.
Lirthei chetvel dan hi Aizawl leh Kolasib traffic Police-in an vil dawn a; MLA tBC Lalvenchhunga hi ‘single point of contact’ niin kawng siam hna hi a vil zui dawn a ni.
Kawnpui, Khamrang, Mualkhang leh Sairang YMA ten hnatlangin kawng siam hna an thawhpui dawn a. Minister K Sapdanga chuan hnatlanga thawk chhuakte chu lawmman pek an nih tur thu a sawi a ni.
Kawng thawmthat hna hi NHIDCL hnuaiah BR Goyal Infrastructure-in thawkin, Mizoram PWD chuan a tul apiangah khawl leh hmanrua nen an pui reng a. Superintending engineer hoin engineer rualin an riahchilh bawk.
July 31 khan lirthei liana eizawng pawl 24 thukhawm chuan Sairang leh Vairengte inkar kawng chu tha se an duh a, kawng chhe siam hna thawktuten lirthei tangkhang tam lutukin an hna a ti chak lo nia an sawi thin avangin, tuna a tangkhang zawng zawng chu sawrkarin tunkar chhungin an panna tur lam lam pantir vek se, karleh chhung hian chak zawka kawng siam a nih theihnan August 4 - 9 chhung hian lirthei tlan loin an lo nghak dawn tih an lo sawi tawh a. Zawhna chhangin lirtheia eizawngtu pawl ho chuan, tuna lirthei an din tir hnu ah pawh kawng chhia hi thawmthat zawh ala nih loh chuan, a hnu leh chu an che na viau tawhin an ring tih an sawi a ni.
8 August 4 (thawhtanni) zing dar 4.00 atang chuan lirthei lian (HMV) Aizawl pan tur chu heng police checkgate - Vairengte Police Check gate, Bairabi Police Check gate, Saiphai Police Check gate leh Phaisen Police Check gate ah dan vek tur a ni. Kawnpui thleng kal tur erawh check gate duty-ten zawh chian hmasak a, dan kher a ngai lo.
8 August 4 zing dar 4.00 a dan hman loh lirthei lian tlante chu Police picket post - Rengtekawn, Zero Point (Bairabi road) leh Kawnpui ah dan vek an ni ang.
8 Truck ke 14 leh a chunglam tan duhthlan tur pahnih a awm a. An bungraw phurh hi tlang kawng (Kawnpui - Durtlang) atangin 407 truck leh LMV dang hmangin an phur/ thiar tir thei a, Rengtekawna ding chu Kawnpui thleng kal phalsak an ni. Bungrua an unload zawh hnu ah an haw/ let leh thei. Hei hi an thlang a nih loh chuan August 9 thleng an nghak anga, NH 06 ah an tlan leh thei ang.
8 Lirthei lian bungrua phur tur 407 truck leh a tiatpui lirthei dang, tlang kawng (Kawnpui- Durtlang) a tlan tur chu thupek chhuah tawh anga an tlan hun siamsak an ni a. Zan dar 10.00 leh a tuk zing dar 5.00 thleng an tlan thei. Bungrua phurhnan hian pik-up lirthei a hman theih bawk a, pik-up lirthei chu tlan hunbi an nei lo.
8 August 7 (NIngani) tlai dar 6.00 atangin essential commodities phur (POL, LPG leh buhfai) chu Kawnpui to Khamrang (NH-06) kawngah chhuah leh tan chauh a ni anga, Aizawl atanga Silchar lam pan chu an tlandan ruahmanna siam angin an tlan thei.
8 Lirthei nawlpui erawh August 9 (Inrinni) zan dar 10.00 atangin Kawnpui to Khamrang (NH-06) kawngah chhuah leh tan a ni anga, Aizawl atanga Silchar lam pan chu an tlan dan ruahmanna siam angin an tlan thei.
8 He thupek zawm lo chu Section 177 & 179 MV Act hmanga hrem an ni dawn a. Thupek hian tul bik thila Police, Fire & Emergency Services, ambulance leh magistrate-te chetvelna erawh a huam lo