Daily Newspaper

Kawng siamtute a hun laiin vil uluk ang – CM

11

Aizawl, July 17 : Chief minister Zoramthanga chuan Mizoram chhunga kawng siam hna thawktute chu an siam laiin vil uluka enzui pui a pawimawh tih sawiin, hna tha thawh a nih theih nan hma la zel turin Road and Infrastructure Development Board member-te a chah.

Mizoram sawrkar hnuaia din Road and Infrastructure Development Board chu an chairman, chief minister ho hian Ningani khan an thukhawm a. Mizoram chhung kawng siamthat leh tihhmasawn zelna tura hmalakna tur an ngaihtuah.

Road and Infrastructure Board chuan Mizoram chhung kawng siam leh enkawl bakah building leh hmasawnna ruangam, infrastructure tihhmasawnna hnate state sawrkar sum hmanga thawh a ni emaw sawrkar laipui sum hmanga thawh a ni emaw a hmunah enfiah a, contractor-te hmalakna enzui chu a hna pawimawh tak pakhat a ni tih Zoramthanga hian a sawi.

Mizorama highway pawimawh tak tak te chu state sawrkar nilo sawrkar laipuiin contract a pek contractor-te thawh a ni tih sawiin, “Tunah pawh hmun pakhata kawng siamthat hna thawh mek chu contractor-ten labour-ah harsatna tawkin hna an tan thei lo a, hei vang hian lirthei kal velten harsatna an tawk a, state sum hmanga enkawl tur ni lo mah se, mamawhna a san em vangin state sawrkar sum hmanga temporary a thawmthat hna thawh a ni,” chief minister hian a ti. Nakin zelah hetianga tih ngai hi a awm tawh loh nan a hunlaia uluk taka invila enzuipui a pawimawh tih sawiin, “Hna tha thawh a nih ngei theih nan a tul chuan Board-in nawrpuiin hma lak mai tur a ni,” a ti.

Fur ruahtui tla chu kawngin a tawrh nasat phah thin avangin tun dinhmunah pawh kawng chhiat avanga mipui chak lakna kawng pawimawh tak takte chu kaltlang theihlohna a awm mai loh nana hma lak chu tuna pawimawh hmasa ber a i tih a sawi.

He thutkhawmah hian Board member-te chu kawng enfiah tur inspection team pahnihah thenin, a remchang hmasa bera kawng en tura chetchhuah tum a ni.

Kawng siam leh tihhmasawn lama state mamawh ang zela awmze nei taka hma lak chhoh zel a nih theih nan Decade Plan (2021-2030), kum 10 chhunga hmalakna tur, mamawh dan indawta ruahmanna siam chungchangte hian sawi a ni bawk a. Board inkaihhruaina terms of reference pawh sawi a ni.

ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy