Kawng siamtuten an namnul an ti
Lunglei district huamchhunga kawngpui siam mek chu a siamtuten an namnul hle nia an hriat avangin lungawilohna lantir an tum tih Lunglei Thalai Pawl chuan an sawi.
Lunglei leh Tlabung inkar National Highway 302 kawngpui chhe lutuk vangin harsatna tam tak a thleng tawh tih Lunglei Thalai Pawl hruaitute hian sawiin, pawl hrang hrangin he kawng siam mek hi vil thin mah se, hmasawnna hmuh tur a awm loa, kawng siamtuten tih takzetin he kawng siamthat hi an vei lo tih an sawi a ni.
Phairuang lei leh Tuichawng lei phei chu tun thlengin siamtha tura hmalak miah loh angin a la awm tih an sawi a. Hei bakah hian Hrangchalkawn, Theiriat, Luangmual, Lunglawn leh Sazaikawn huamchin phei chu kutthlak a tlem hle a, a enkawltu NHIDCL leh BRN Company chuan inthlahdah takin a remchang apiang hnathawk tur pawtkhawmin an namnul mai mai nia an hriat thu an sawi.
Lunglei Thalai Pawl hian Aizawl -Thenzawl- Lunglei kawngpui chhe lutuk pawh veiin, Gauhati High Court-ah PIL an thehlut a, High Court chuan PIL hi ngaipawimawhin kumin October 30 khan Mizoram sawrkar chu kawng siam dan thlalak leh affidavit siama thehlut turin a hriattir tih an sawi a ni.
Kawng siamtuten an namnul an ti
