Kum 10 vel liamta kha chuan Shubham Dubey hian cricket khelhna hmanrua, kutkawr leina tur takngial pawh pawisa a nei lo. A pa, Badriprasad chuan Kamal Square, Nagpur-ah kuhva dawr a nei a, chu chu an ei ber a ni. Mahse, Thawhlehni kalta khan IPL auction-ah Shubham Dubey chu Rajasthan Royals-in 2024 IPL season a an team a khel turin cheng vaibelchhe 5.8-in an lei ta. Chutiang zozai sum avang chuan Shubham leh a chhungte chu an hamhaih zawk hial a ni.
Dubey chuan, “Mumang rama cheng ang mai ka ni. Syed Mushtag Ali Trophy (SMAT)-ah khan ka che tha ve phian a. Chuvangin, audtion (IPL)-ah hian min thlan ve mial te chu ka lo beisei ru ve deuh a. Mahse, dik taka sawi chuan hetiang sum hi chu ka beisei lo nasa,” a ti. Kamal Square-a an chhungkaw chenna inah chuan duhsakna leh lawmpuina hlantu an lut chhuak zut mai a ni.
Dubey, kum 27, hi SMAT-ah khan a che tha hle a, match sarih khelhah run 222 a vaw chhuak a, a strike rate chu 187.28 a ni a, match sarih a khelhah hian fours vawi 10 vaw chhuakin, sixes vawi 18 a nei thei bawk. Left-hand batter a ni a, Bengal nen an inkhelh tumn Vidarbha tan ball 18-ah run 50 a vaw chhuak hman tlat.
Tunah chuan a lar chhuak ta, mahse, a chawr chhuahna hre rengin a inngaitlawm hle a, an harsat laia amah pui thintu te a theihnghilh lo. “Kan sum leh pai dinhmun kha a chhe ve thin hla a. Pu Sudip hian min pui nasa thin. Ani puihna kha dawng lo ila engmah ka ni lo ang,” tiin a mentor chatuan ram pan tawh Sudeep Jaiswal hming a lam chhuak.
Jaiswal hi ukil a ni a, Advocate XI a buaipui thin a, he club hi sum leh pai lama harsa talent nei tha si te tanpuitu a ni. Mahse, Jaiswal hi kum 53 mi chauh niin, 2021 khan Covid avangin mual a liam tawh a ni.
Dubey chuan, “Ka tan chuan kutkawr takngial pawh lei ngaihna a awm lo. Ani khan bat leh hmanraw dang zawng zawng min pe a. Under-19, Under-23 leh ‘A’ Division team-ah XI-ah min khelh tir thin. Ani kha awm lo se Vidarbja Cricket Association team-ah hian ka tel thei hauh lo ang,” a ti bawk.
Kawng sira kuhva zuara eizawng \hin fapa Rs 5.8 crore-in Rajasthan Royals-in an lei
