Aizawl Treasury Square atanga Bazar Bungkawn inkar kawngpui zauhna atan Assam Rifles ram chhuahsan tak chu March 17 atang hian laih tan a ni dawn tih UD&PA minister K Sapdanga chuan a sawi.Assembly Session-a zawhna chhangin UD&PA minister chuan, Assam Rifles ram chhuahsan hman zui dan tur reltu sawrkarin a din – Advisory Committee ruahman, UD&PA-in a kalpui turah ‘heritage value’ nei tak tak lo (Quater Guard leh Loch House leh thenkhat dang tih loh) chu mipui tana tangkai zawk turin thiah leh thenfai a ni anga, March 17 zing atangin thawh tan a ni dawn tih a sawi.
Treasury Square leh Bazar Bungkawn inkar kawngpui chu feet 50 velin nawr zauha laih tlang a ni anga, hei hian kawng tih zauh lai ni lo, a zawm zeltu kawngpuiah pawh traffic tawt lutuk tur a chhawk zangkhai deuh beisei a ni tih a sawi.
Zodin Square leh Canteen Kual inkara mandir awm chu sawrkar laipui remtihna thlapin suanchhuah a ni dawn tih a sawi a. A sawnna tur an zawn chu la remchang rih lo zel mah se, an hmu zo ngang lo a nih pawhin sawrkarin hual ruk a nei tho tih sawiin, “Engti kawng pawhin khawiah emaw chuan sawnchhuah a ni ang,” K Sapdanga hian a ti.
Ruahman dan chuan, mandir heltu Canteen Kual hi feet 20 chuang deuha zauin tih tlang phei a ni anga, chumi leh kawngpui inkar, tuna mandir hmun pheiah hian mipui tualchaina tur ‘public park’ siam a ni dawn tih a sawi a ni.
Lammualah phul lem chu phul lem tha ber chia thlak a ni dawn a, AR Cinema Hall bulah a zau thei ang berin LMV parking atan chhawng thum tala siam tum a ni tih a sawi bawk. A chhawng linaah hian mi 2000 tal len theihna hall lian sak tum a ni a, Vanapa Hall chu sakthat a ngaih bakah a hmun a zim avangin hall sak thar tur hi ‘Vanapa Hall’ tih a ni anga, tuna Vanapa Hall chu thildanga hman tangkai tum a ni tih a sawi.
Vantlang hmun pawimawh a awm nual dawn avangin a bul tlang bawk pakhat chu police duty-na hmun atan siam rawt a ni tih a sawi bawk.
AR ram chhuahsan taka hmun zau zawk chu ‘green area’ a siam a ni dawn tih UD&PA minister hian a sawi a. Lammual thlang lamah ngaw siam tum niin, lirthei luh theih lohna tur kalkawng siam a ni anga, insawizawi duh leh lenkhawthawnna atan ruahman tum a ni tih a sawi.
“Inbiakrem ngai tlem tlem a la awm a, a berem turten an biak tawh chinah an la lawm rih zel a ni,” a ti.
Kawng zauhna atan AR ram chhuahsan lai hek tan dawn
