Kolasib district bawrhsap chuan Kolasib to Kawnpui kawng siam mekah pawl anga lungawilohna lantir emaw kawngpui dangchat zawng emawa hma la lo turin pawl leh mipui a ngen.
Nilaini khan Kolasib bawrhsap Robert C Lalhmangaiha kaihhruaiin National Highway 306 Kolasib – Kawnpui inkar siam meka hmalakna chu thlirho a ni a. He kawng siamtu NHIDCL hnuaia Balaji Construction chu ruahmanna awm tawh ang ngeiin black topping chu 2025 March 31-a zo fel hman turin a chah. Fur khaw chhia a thlen hma ngeia kawngpui siam hna zawhfel a nih loh chuan mipui bakah a kawng siamtu company tan pawn harsatna lian zawk a awm thei dawn tih hrilhin, NH 306 chu Mizoram luhka pawimawh a nih angin Kolasib mipui mai ni lo, Mizoram mipui tan nitin mamawh chawkluhna kawng pawimawh a ni a, chumi hrerenga kawng siam hna chak zawka thawh a pawimawh, tiin, Balaji Company chu thawktu leh hmanrua pawh lakbelh turin a chah.
Thutkhawmah hian Kolasib to Kawnpui kawngpui siam mekah inzawmkhawm pawl thenkhatten lungawi lohna an thlen chu ngaihtuah ho nghal a ni a. Bawrhsap chuan kawngpui siam mekah hian mipui chu a siamtute tan harsatna siamsak lo tura chahin, kawngpui tha tak siam a nih theihnan sawrkar leh a siamtuten theihtawp an chhuah a ni tih hria a, zaidawh taka awm turin a chah. Pawl anga lungawilohna lantir a awm pawhin mipui leh khawtlang nunphung tibuai lo zawnga tih lan ni thei se, tiin a ngen a. National highway dangchat zawnga hmalakna emaw mipui nunphung tibuai zawnga hmalakna awm lo se a duh tih a sawi bawk.
Kolasib superintendent of Police David H Lalthangliana pawhin kawng siam hna chak leh tha taka kalpui a nih theihnan lirthei kal dan vilpui tur leh a tul anga tanpui turin an inpeih reng tih a sawi a ni.
Thutkhawmah hian district administration hotute, NHIDCL leh Balaji Construction aiawh, Mizoram PWD aiawh, Sub-Hqrs YMA Kolasin leh Joint Action Committee Mizoram Truck Owners Association aiawh an tel a ni.
Kawngpui dang zawnga hma la lo turin bawrhsap-in pawl a ngen
