Daily Newspaper

Kawngpui siamna tur sum awmna hre lo

8

Kolasib district-a Phainuam leh Saihapui ‘V’ inkar kawngpui, cement concrete-a luanna turin cheng nuai 16 hmuh tawh atangin nuai 7 chu a awmna chin hriat a ni lo.

Kolasib-a chanchinbumiten helai kawng siamna hmun bialtu, Bilkhawthlir BDO an zawhfiahnaah Phainuam leh Saihapui ‘V’ inkar kawng, metres 200-a thui siamna tur hian MGNREGS 2019 to 2020 material components cheng nuai 9 pekchhuah a ni a, boulder lung phah chungah PCC (plain cement concrete) flooring tih tur a ni a, working agency – Block Employment Council Vairengte chuan thawkin a sei zawng leh a chhah zawng bakah a zau zawng thlenga a tlin loh avangin block office lam chuan metres 200 dang siam belh leh turin an hriattir tih a hrilh a ni.

He kawngpui siam hi Kolasib chanchinbumite hian a hmunah an enfiah a, measuring tape hmanga an teh chhuah vek hnuah, material component sum hmanga thawh zawng zawng metre 400 turah hian metre 241 chauh thawh a ni tih an hmuchhuak.

Helai kawngpui vek siam nan hian Serlui bialtu MLA Lalrinsanga Ralte chuan a MLA Fund, working agency-ah Phainuam YMA kaltlangin, cheng nuai 2 a pe a, hemi hmang hian metre 100-a thui, metre 3-a zaua siam tur a ni. Hei hi chu a thawktute ruling party worker an ni a, metre 32-a thui chauh an siam bakah a zau zawng pawh a nih tur ang a tling lo chanchinbumite hian an sawi a ni.

Hetihlai hian Rural Development minister Lalruatkima chuan, ramri lam khua tihhmasawnna turin helai kawng vek siamna tur hian a department atangin nuai 5 a pe tih sawi a ni bawk.

Hei hi contract anga thawh niin, he sum hmanga kawng, cement concrete-a luan tur thui zawng hi metre 129 a ni a, RD lam chuan metre 250 vela thui siam tur a ni tih an sawi a ni.

Thudawn danin, Phainuam leh Saihapui ‘V’ inkar siamna atana tunhnaia sum hmuh tawh zawng zawng hi nuai 16 a ni ta a, mah se, an kawng siam thui zawng hi MGNREGS material component sum hmanga thawh tura tih zat – metre 400 chu a tling hram chauh a, MLA fund nuai 2 leh RD department sum nuai 5 hmanga hnathawhna hi a taka hmuh tur ala awm lo anga ngaih theih a ni tih a hmuna tlawhtu chanchinbumite hian an sawi a ni.

Hetih lai hian MGNREGS material components 2019 to 2020 sum hmanga hnathawh a nih tarlanna chu paih bo a ni a, a hmunah hian MLA LAD Fund 2019 to 2020 nuai 2 hmanga hnathawhna anga tarlanna ziah a ni thung tih an sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy