Ke lek vanga hrem tawk Garcia
Watford leh Brighton boss hlui Oscar Garcia kha Mexican league lamah insawn tawhin, tunhnai game-a Colombia forward James Rodriguez a pet avangin thla thum chhung touchline atanga a team enkawl kaihruai thei lo tura hnawhbo a ni.
Thil thleng intanna chu Guadalajara boss ni ta Garcia hian touchline-ah ball a chhar a, ball la tura amah pan mektu Leon midfielder Nicolas Fonseca hnena ball chu pe tha duh ta mai loin Fonseca awm lohna lamah a paih daih a, Leon player thinrim chuan substitutes’ bench lam hawiin Guadalajara coach hi a nam ve salh a, chu chuan team pahnih player leh coaching staff ve vete inkar boruak a chhem alh nghal hluai a, chu mi hrinchhuah inbakkaihna chhuakah Garcia chuan Rodriguez-a hnunglam ke a petsak ta mai a ni.
Kum 51-a upa Garcia chu touchline atanga hnawhchhuah zui nghal niin, a hnuah thupha chawina a tarchhuak a, hremna erawh a pumpelh zo ta chuang lo a ni.
Kha Liga MX game-ah khan 2-1-in Leon an chak nghe nghe.
A coaching career-a Maccabi Tel Aviv, Red Bull Salzburg, Olympiakos leh Celta Vigo-te pawh lo enkawl tawh coach tawnhriat ngah tak Garcia hi nikum December thla mai khan Mexican club Guadalajara chuan an ruai tan a, kum a thar a, buainain a tlakbuai zui ta a ni.
Real Madrid, Bayern Munich leh Everton player hlui Rodriguez zawk hi tunah kum 33 mi ni ve tawhin, tun January thla herchhuah rual chiah khan Leon hi free transfer-in a zawm.
Ke lek vanga hrem tawk Garcia
