Daily Newspaper

Ke puncture chunga chak Hamilton

30

Pathianni British Grand Prix-ah lap tawp ber a tyre puncture chungin Mercedes driver Lewis Hamilton chuan home race hnehna a chang a, Silverstone tlankawnga vawisarih a chakna a ni ta.

Formula One world cham-pionship-a mihang driver awm-chhun ni mek Mercedes driver hian pole position atanga bul tanin, a tawp lamah talbuai deuh mah se han lehpel zo an awm ta chuang lo a, world championship stan-ding-a a hmahruaina pawh point 30 a kai chho ta a ni.

Hamilton hian lap hnuhnung-bera a buaina ang kha intlansiak a hmachhawn tawhah a la tawn ngai loh thil a nih thu intlansiak zawhah a sawi.

Red Bull driver Max Verstappen chu pahnihna niin, tyre thar vuah turin tawikhawmuang lo se la chu Briton lehpel thei dinhmunah a ding a, fastest lap changin point khat dang a hui tel ta tho a ni.

Pathianni intlansiaka pathumna chu Ferrari car khalhtu Charles Leclerc niin, team an talbuai laia an driver-in podium a lawn nawlh hi Italian team tan result lawm-awm a ni ngei ang.

Hamilton-a team mate leh driver standing-a Briton hnaihbertu ni bawk Valtteri Bottas chuan intlansiak tawp lama a ke ‘puncture’ a tuar a, ke keh ve bawk Hamilton angin a palliam thei ta lo a, sawmpakhatnaah thlengin point a hmu zo ta lo a, Mercedes ‘one-two finish’ a beiseiawm chhoh reng laiin hmuh tur a awm ta lo a ni.

World champion vawiruk ni tawh Hamilton chuan lap tawp ber an tlan hma zawng kha chuan tluang taka race a hmachhawn thu sawi chungin lap tawp berah tyre harsatna tawk bawk mah se a chhiatpui ta lo tih a sawi a, tlanmuan phah lo tura a tawngtai thu sawiin, a chet dan avanga Pathian hnena lawmthu a sawi thu a tarlang tel.

Pathianni hnehna kha a F1 career-a Hamilton-a’n race hnehna tum 87 a channa ni tawhin, Ferrari great Michael Schumacher-a all-time record (91) tluk turin vawili chiah chak a mamawh tawh.

A z^wna vawisarih title double tuma championship luhchilh mek Mercedes hian tun season-a intlansiak vawili awm tawhah hnehna an la chang vek a ni.

Silverstone tlankawnga Pa-thiani race-ah Renault khalhtu Australian Daniel Ricciardo chu palina niin, a McLaren team-mate tur Lando Norris a hmakhalh chiah a, McLaren driver dang Carlos Sainz chu puncture vangin a talbuai a, 13-na a ni pha chauh.

Renault driver dang Frenchman Esteban Ocon chu parukna niin, Renault-in point an thawk tha hle.

Ocon-a chipui Pierre Gasly chuan AlphaTauri car chu pasarihnaah thlenpuiin, British-based Thai Alexander Albon (Red Bull) chu pariatna a ni.

Canadian Lance Stroll chuan Racing Point chu pakuana nihpuiin, Ferrari driver Sebastian Vettel chu final point hmutu a ni thung.

Kartawp Pathianni hian Silverstone tlankawngah bawk race an chhunzawm leh dawn a, kum 1950-a he track-a world championship race an nghah tan atang khan a kum 70-na an lawm dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy