Daily Newspaper

Kea kalte awmze nei zawka kawng kan theihna tur siam

19

Kea kal mipuite leh lirthei khalhtuten him leh mumal taka kawng an hman theihna tur Aizawl khawpui hmun 10-a traffic light hmanga kawngkanna – Pelican Crossing System bunfel chu hman theih turin Zirtawpni khan deputy chief minister Tawnluia chuan Treasury Square-a crossing system chu hmet engin mipui hnenah a hlan.

Aizawl Smart City Ltd. hmalaknaa siam pelican crossing hi Aizawl khawpuia mipuiten him zawka kawng kan kan theih nana siam a ni a, a bun hna hi M/S Innovations Delhi-in Rs. 22,17,810 in an thawk a ni. Kawngpui lun leh mihring tamna lai zel hmun sawmah dah a ni a. Traffic Police ten an control anga, mihring leh lirthei chetvel dan vawngtu tur a ni.

Mipui leh lirthei khalhtute tan signal en tur a awm hrang a, mipui kea kalte tana signal en tur Pelican board-ah mihring lem a sen laiin lirthei khalh mektu tana en ve tur traffic signal chu a hring anga, lirthei a tlan mek tihna a ni a, kawng la kan loh tur a ni. Traffic Police-in mipuite kawng kan tul a tih hunah Pelican Board ami chu a hmet anga, board ami mihring lem chu a lo hrinin traffic signal chu a sen ve thung anga, mipui tan kawng a kan theih tihna a ni ang. Automatic leh manual-a operate theih a ni a. Traffic police lam duhdanin tunah chuan manual a operate tura siam (set) a ni a, duh hunah automatic a set mai theih a ni.
Deputy chief minister chuan Aizawl khawpui thang zelah Aizawla pemkhawm an pun ang bawkin lirthei a pung nasa a, mumal zawka lirthei tlan dan leh kea kal mipui himna atan kawng hrang hrangin hma lak a ni tih a sawi a. Pelican crossing chu Aizawl traffic management chanchina mellung pawimawh a nih bakah Aizawl khawpui thanna – urbanization ngaihtuahin thil tangkai tak a nih a beisei thu a sawi.

Urban Development & Poverty Alleviation minister ni bawk Tawnluia chuan Aizawl Smart City hnuaia hmalakna hrang buaipuitu ber chu an department nih mahse, department hrang hrang nen thawk ho tlanga hma lak ho a ngai, tia sawiin, department hrang hrang tawimawn an hmu tha chu lawmawm a tih thu te, Smart City hnuaia hnate hi thawh zawh an nih hnuah a department concerned-te hnenah hlanchhawn zel a nih dawn thu te a sawi bawk.

Smart City hnuaiah project 78 hlawmkhawmin project 33 hi state sawrkar hmalakna, state matching share atana telh a ni a. DPR 27 siam zawh tawh niin, project 10 chu tender tawh a ni. Aizawl Smart City Project tihhlawhtlinna atan sawrkar laipuiin cheng vaibelchhe 128 a rawn pekchhuah tawh atangin vaibelchhe 68 chu tunhnai lawka a rawn release a nih thu a sawi.

He hun hmanpuitu Aizawl mayor PC Lalhmingthanga chuan pelican crossing system chu kawng neitu mipute himna leh an awlsam zawka tura ruahmanna tha tak a ni, tiin, AMC pawhin Aizawlah kea kal mipui him zawk nan hmun tam takah kea kalna tur footpath ruahman leh siam mek a nih thu a sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy