Champhai kianga luang Keilungliah lui khuah enkawl kawnga mawhphur tura sawrkarin a din, ‘District Level Committee on Post Completion Management & Maintenance of Dam Reservoir cum Recreation Centre at Keilungliah’ chu Nilaini khan an chairman, bawrhsap James Lalrinchhana hoin an thukhawm.
Keilungliah tuikhuah tlawhtute atanga luh man lak tlingkhawm tawh dante thlirlet niin, tuikhuah leh a chhehvel ram venhim kawnga pawimawh leh land lease siam tura hmalak tulte sawi ho a ni a. Lirthei lutchhuak khuahkhirh dan tur sawihoin, tuikhuahna laia lirthei lian kaltlang thinin tuikhuah himna a nghawng theih avangin LMV chunglam tana kaltlang phal loh nise an ti. Ruahhmanna siam dan turte sawihoin an pawm.
Lui tlawhtute tana lenkual velna tur lawngleng (boat) service dah chungchang leh buh leh thlai chawmna’na hman dan turte pawh ngaihtuah a ni a. Agriculture department atanga thal thlai chawmna’na tui lak dilna lut chu tuikhuah chhan zinga pawimawh pakhat a nih tel avangin zirchian hnu ah a tul anga hma lak tha tih a ni a; tuikhuaha tui awm dan, thlai chawmna’na mamawh dan, crop planning leh tul dangte zirchiang turin line department-te ruat an ni.
Keilungliah leh a chhehvela nungcha leh thingte humhalh tlat a nih avangin Committee chuan sangha leh nungcha dang man lo tur te, a kama thing tichereu lo turin mipui a chah a; dan loa thil tite chungah a tul anga hma lak a nih tur thu sawi a ni.
Tuikhuah tlawhtute tana luh man, ticketing system kalpui mek, 2022 December 15 atanga kalpui tan, puitlingah Rs 20, naupangah Rs 10, two wheeler Rs 20, three wheeler Rs 30 leh four wheeler Rs 50 zela lak chu kalpui rih nise an ti a; tuikhuah tlawhtu ni lo, tuikhuah paltlang thinte tan erawh luhtlang man luh man rate bithliah pangngai chanvea lak tha tih a ni.
Keilungliah tuikhuaha hnawmhnawk lut tur dan a nih theihna’n gabion wall siam chungchang sawi a ni bawk.
Keilungliah enkawl dan tur rel
