Kendrick Lamar ‘Not Like Us’ a Hot thar leh ta

Kendrick Lamar hla hit, Drake a kahna, ‘Not Like Us’ chu Billboard Hot 100 (singles) chart-ah a No.3 atangin No.1 a kai leh ta a, he chart-ah hian a zawn lovin kar hnih a No.1 ta. Kendrick Lamar hian a hla hit ‘Not Like Us’ hi a official music video a tichhuak thar a, hei hian a hla a tilar thar leh ta a ni. Hetihrual hian Morgan Wallen ‘Lies Lies Lies’ chu chart No.7-ah a debut bawk e.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Kendrick Lamar ‘Not Like Us’ hi kar kua liam ta khan Hot 100 chart No.1 a rawn kai a, chumi hnua No.2 leh No.6 inkarah a kual deuh zak zak a, tunah No.1 a rawn kai thar le ta a ni. He hla hian kar liamta khan US-ah stream maktaduai 53.8 leh sales 8,000 neiin, radio airplay pawh ngaithlatu maktaduai 40 a nei leh a, hei hian No.3 atangin No.1 a kaipui leh ta a ni.
Shaboozey ‘A Bar Song (Tipsy)’ chu No.1 atangin No.2-ah a tawlh a, chart No.1 hlui Post Malone ‘I Had Some Help’ featuring Morgan Wallen chu No.2 atangin No.3-a a tawlhin, Tommy Richman ‘Million Dollar Baby’ chu No.5 atangin No.4 a kai thar ve leh thung. Sabrina Carpenter ‘Espresso’ chu No.4 atangin No.5-ah a tawlh a, Sabrina hla dang, chart No.1 pawh lo ni tawh ‘Please Please Please’ chu No.6-ah bawk a la awm.
Morgan Wallen hla thar ‘Lies Lies Lies’-in stream maktaduai 27, sales 14,000 leh radio airplay maktaduai 4.5 neiin, No.7-ah a debut a, Wallen tan he chart top 10-a lang thei hla 10 a neihna a ni.
Chart No.6-ah Sabrina hla ‘Please Please Please’ awmin, No.7-ah Wallen ‘Lies Lies Lies’ a awm ve thung a, Billboard Hot 100 chart history-ah hla thupuia hetianga thumal pakhat vawi thum hman zawnna hi chart ranking-a a indawta a awm vawi khatna a nih bakah chart top 10-a phei chuan a indawt ni kher lo pawhin hla thupuia thumal ngai vawi thum hman nawnna ang chi hi tum khatah pahnih a awmna a ni bawk.
Chart No.1 hlui Hozier ‘Too Sweet’ chu No.7 atangin No.8-ah a tawlh a, Benson Boone ‘Beautiful Things’ chu No.8 atanga No.9-ah tawlhin, chart No.1 hlui Teddy Swims ‘Lose Control’ chu No.9 atangin No.10-ah a tawlh ta bawk.