Nimin Pathianni zing khan Kristian sakhua zuitute punkhawmnaah bomb tih puah niin mi pakhatin nunna a chan a, midang 20 chuangin hliam an tuar a ni.
Counter Terror (CT) leh National Security Guard (NSG) te chuan he thil thleng hi chhuiin a hmunah an thleng nghal a, Jehovah Witnesses Church, Kalamassery, Kerala-ami ten Pathianni zinga inkhawmna an neihna hmuna thleng niin tu ti hriat loh ten Kristian pungkhawm zingah bomb hi an ti puak niin an sawi a ni. Kum tamtak helai ram biru tak mai hi Counter Terror ten an vil reng tawh hnu in nimin zing khan he vanduaina hi a thleng thut a, hmeichhe pakhat leh midang 23 laiin hliam an tawrh thu report dawn a ni.
He thil thleng chhuitu ten hliam tuar te atanga an hliam awmdan te leh an dinhmun atanga a lan danin he bomb puak hi Improvise Explosive Device (IED) ni ngeia hriat a ni a, hliam tuar te dinhmun pawh en thlithlai reng a nih thu an sawi a ni. Bomb puak hi Pathianni zing dar 9:40 niin pawi khawihtu te hian hemi hunlai Kristian ten Pathian biaa an punkhawm hun lai vel hi an tum ngei ni a rin niin he thil thlen lai vel hian mi 2500 lai an pungkhawm a ni.
He thil thleng chhuitu CT te chuan hun engemaw kal ta atang khan Muslim firfiak pawl Popular Front of India (PFI) te chu Kochi atanga hnai te Kalamassery-ah hian thil engemaw an ti thin tih an hmuchhuak a.
Amaherawhchu, PFI te hian firfiak taka an chetlaknaah IEDs hi an hmang ngai lo tih an hria a ni. He thil thleng hi Kerala hmar lama Malappuram hmuna Hamas hruaitu Khaled Mashal-an mipui pungkhawm hmaah Jamait-e-Islami firfiak te chu an mahni ringlo te chungah chuan tharum thawhna pawh hmang mai tura a hrilh hnu lawk a thil thleng a ni.
Police DGP chuan, “IED device chu tiffin box chhungah dah a nih thu hnu chhuitute chuan an hmu chhuak a. A aia chiang zawk beisei leh zel a ni,” tiin a sawi. Hnu chhuitu te chuan minutes rei lo te chhungin bomb hi vawi thum a puah thu an sawi a, a vawi khatna chu dar 9:40 Am velah niin hei hi mipui pungkhawm ten tawngtai rual inkhawm an tan atanga darkar chanve vel a ni.
Kerala Chief Minister Pinarayi Vijayan chuan thil thleng chu ngun taka vil reng a nih thu a sawi a, “Hei hi thil thleng vanduaithlak tak a ni. Thil thlen dan kimchang lak khawm mek a ni.
“Hotu pawimawh zawng zawng te Ernakulam-ah an awm a, DGP chu a hmunah a awm mek a, he thil thleng hi kan ngai thutak hle a ni. Thil thlen dan engkim chhui a nih hnuah chanchin kimchang min hril turin DGP ka bia a ni,” tiin CM chuan a sawi a ni.
Hetih lai hian NIA team Kochi unit te chuan vanduaina thlenna hmun an thleng tawh a, Delhi atangin NIA team dangte chu lo thleng leh thuai tura beisei a ni bawk. Police-te leh kang thelhtu pawl te chu a hmunah an awm renga, inhliamte chu Kalamassery Medical college-ah lak an ni.
Kerala health minister Veena George chuan health department director chu inhliamte enkawlna turin damdawi in chu lo buatsaih turin a hrilh a ni.
Kerala bomb puakah mi 1 thi, 20 chuangin hliam tuar
