Kerala vaukama lawng lian kang la thelh zel

Kerala vaukama lawng lian kang la thelh zel
Indian Coast Guard (ICG) lawngte chuan Nilaini thleng khan Kerala vaukama Singapore bungraw phur lawng lian, MV WAN HAI 503-a kangmei chhuak chu a thelh hna an la thawk zel.
Lawnga kangmei chhuakah hian a khu a la nasain van lamah a invawrh chhuak nasa hle a, thelh tuma beih chhunzawm niin a sawt rih lo hle bawk.
ICG chuan Thawhlehni tlai dar 05:00 vel atang khan lawnga kangmei hi a ziaawm hret tih erawh an sawi a, a khu erawh a la nasa hle tho.
Thawktu mi thenkhatin hliam an tawrh phahna kangmei chhuak hi thunun tuma beih chhunzawm zel a la ni a. Lawngah hian thawktu mi 22 zinga 18 chu Indian Navy-in an chhanchhuak a, mi dang pali erawh an chin hriat a la ni lo.
India-a Chinese Embassy thupuangtu, Yu Jing-a chuan Nilaini khan Indian Navy leh ICG-ten kang thelh tuma an beihna leh thawktu chhanchuahna kawnga an thawhna chu a fak.
Bungraw phur lawng lian hi Kerala-a Azhikkal atanga tuipui mel 44-a hlaa a awm laiin a lai vel takah thil puakin a kang zui ta chiam a ni.
Yu Jing-a chuan MV Wan Hai-a thawktu chuang zingah hian Chinese leh Taiwanese pawh an tel niin a sawi a. Chinese foreign ministry thupuangtu pawhin chin hriat lohva la awmte zawn hna hlawhtling taka thawh a nih theih nan leh hliam tuarte tha taka dam leh turin duhsakna a hlan.
MV Wan Hai 503 hi Thawhtannia kang tan kha a ni a. Thawktu mi 22 chuang zingah hian Taiwanese parukte nen Chinese 14 an tel a ni.
ICG chuan a puah hnu lawk atangin thawktu pali hi an chin an hre lo zui nghal tih an sawi a, chhanchhuah zinga pangain hliam an tuar bawk.
Chhanchhuak tak mi 18 zinga paruk hi AJ Hospital-ah inenkawl turin Thawhlehni zanlai hma deuh khan dah luh an ni a. Plastic Surgeon Dinesh Kadam chuan an zinga pahnih hi an na hle a, an taksa 35-40% vel a kang niin a sawi.