Lallunghnema
Charity Lodge
Cont: 9862288182
Chhiartute chibai ka bûk a che u.
Kan hnungah khan Maximum Retail Price pawimawhzia sawiin MRP Movement tih thupuiah ka hmang a. MRP ringawt a tâwk loh thu ka sawi bawk a ni. Thil zuartu leh hralhtute pawh hian MRP aia hniama an bungraw hralh chu an tih tur a ni. Hlêp tam tum lova, hralh tam tum tur a ni. Chu chu dawr kai hlawhtling zia a ni. Hemi bâkah hian Consumer khawvel din a tulzia te, consumer-te hi ram economy siam that nan a mawhphurtu kan nihzia te chu thahnemngai takin ka sawi bawk a ni.
Consumer-te Dikna leh Chanvo buaipui reng mai mî ka lo nih tak avang hian ka thil tawn leh beng hriat tam zawkte hi thil leitu leh hmangtute chunga lo thleng a ni a. Ka kalna leh chêt vêlnaah hian consumer-te thil hi ka hawina lam a ni ta zel mai.
‘Consumer’ tih hian a huam zau zia kan sawi thin a. Thil lei a ni ringawt lova, hman a huam tel a ni kan ti thin. Hei hi Consumer Protection Act 2019 sawi fiah dan a ni bawk. Consumer nihna hi a ril hle a, CPA 2019 pawh hianin a huam zautir hle a, a dah pawimawh hle a ni.
Ka sawi thin a, ka sawi leh thin ang. Vawiin nîah hian Consumer tam takin Consumer an nih an inhre lova. Dikna leh chanvo an neih tih reng an hre hek lo!
Heng Transport Service:- Bus, Taxi, Aeroplane, Rail, Rickshaw leh Maxi Cab passenger-te hi consumer an ni a, Dikna an nei a, Chanvo an nei bawk a ni. Sum an hmang a, an seng bawk a, an sum senso hû chu an hmu ngei tur a ni.
Vawiin chu tun hnai têa City Bus -a ka thil hmuh leh hriat ka sawi dawn a ni.
Ni khat chu kan rawngbawlpui leh laina hnai vai tak mai vuinaah ka kal a. Hemi ni hian khua a lum hle a, degree celsius 37° vel a ni âwm e. Chuti chung chuan half – coat vâr ka la ha talh a. Nalh ka duh êm êm vang pawh ni lovin kha kan thlah liam tur kha ka dah pawimawh vang a ni a. Tichuan, kan thianpa kan vui liam hnu chuan in lam panin ka thianpa two wheeler-ah thui vak lo chu ka inham tang ve naw naw a. Ani, ka thianpa nena kan inthen hnu chuan experience atan pawh tiin City Bus – ah chuan stand eng emaw zât ka chuang ve leh ta a. A lum khawp mai! Seat nuam takah ka thu a, a njam phian mai!
Bus conductor pa sa tha lam deuh biak nuam ang reng tak hnenah chuan bus fair chu ka pe a. Bawngkawn atanga Treasury Square atan Rs 30 /- ka pe, STA rate ni hmiang, ka ti? Chutih lai chuan Mizoram chhak lam khaw pakhat atanga Aizawla lo zin mi pathum(3) hi he bus- ah hian an lo chuang tel ve bawk a. Anni chuan Bus fair chu Kulikawn thlenga kal tur emaw intiin Kulikawn thleng bus chuan man (fare) chu an pathum chuan an pe a. Mahse an kalna tur chu Kulikawn thleng ni lovin Tuikual thleng chauh a lo ni zawk a, AR lammual bus stand a chhuk tur an ni. Chutianga bus fare an pek chuan (exceed) avang chuan bus conductor chu an chuan loh man (bus fare) chu pe lêt leh turin an dil a. Mahse, Conductor chuan aw ki sang tak chhuahin, “A theih tawh loh, saw lehkha tar saw en ta che u”, a ti ta chiam mai a. Anni ho chu an hrilhhai hmel ang reng hle mai a. “A nih tak chu”, tiin an ngawi ta ringawt mai a. An chhuk nghal a. Eng mah an sawi zui ngam lo a nih chu! Kei Consumer Activist inti ve pawh chu ka hrilhhai hle mai! Han tawng chhuah ka tum mek lai chuan anni unau ho chu an lo chhuk ta daih mai si a. Bus conductor pawh chu ka khik, khak hran ta lêm hlei lova. Khâng conductor-in fair a pêk lêt duh ták lohte kha ka khawngaih ta hle mai a. An chhuk hnua tawng chhuah pawh chu a rem teuh lova. Ka inthiam lo hle! Consumer Activist dawizep ka lo ni ta em ni? Ka insawh, ka insawh!
Consumer Group-ah chuan he ka thil tawn hi ka post nial nual a. Comment a awm nual mai! Bus Service hi mipui chhawr tur a ni a, chhawrtute chu zah tur an ni. Bus conductor-te pawh hi inzir ve rawh se. Bus passenger-te hi namnul ngawt tur an ni hek lo. Consumer Protection Act thlirna tukverh atang phei chuan bus passenger-te chuan right an neih angin humhalh an ni tur a ni, tih hi pawm hmiah mai tur a ni.
Kan sawi tam ta e, Consumer issue kan sawi thin hi ‘politics fîr’ a ni a. Sual kai lo eirukna tel lo politics thianghlim a ni. Tih tur nei lo, patling ve pui, party politics khel ho hi he lamah hian lo pen chhuak teh u, in inchhir lovang. In chhungkaw tan a ni a, nangma tan a ni a, ram economy leh eiruk do nana tha tawp a tling a ni.
Mahni chakna tha hrui ti chat tuah nang chu tang lul suh. I theihna tichaktu ni zawk ang che. Consumer kawng hnawh pingtu ni suh la, consumer- kawng hawnsaktu ni zawk rawh. I zir peih loh chuan i hriat lohnain a vaw thlu tho ang che.
Tun tuma ka article hi consumer slogan hian ka han khar ang e:
Mi zawng zawng consumer kan ni!
Inveng tha la, fimkhur rawh!
Hawihhawm chhuah la,
Rinawmna vawng tlat rawh!
Chapo lo la,
Tlâwm takin awm rawh.
Huaisenna hi hnehna a ni!