Khalhtu ngai lo, ni chakna hmang bus siam chhuak
Indian researcher-te chuan tun hmaa an la siam chhuah ngai loh bus an pho chhuak thei ta a, he bus hi ni chakna (solar energy) hmanga tihkal theih, khalhtu pawh ngai lo a ni.
Khawvelin lirthei a hmuh tawhte hi petrol, diesel, CNG leh electric tha chakna hmang (charge) ngai vek a la ni rih a. Tun tuma India-in a siam chhuah erawh a danglam bik ta hle a ni.
Vawi khat charge full tawh chuan km 70 thleng a tlan thei a, Rs. Nuai 15 man vel chauh a ni bawk a, charge nan hian bus bangah hian solar panel dah a ni a, a tlan pah pawhin a in-charge thei reng dawn a, power kilowatts 2 khawl theiin lead acid battery 6 a hmang bawk a ni.
Lovely Professional University, Phagwara-a he bus siam chhuah nana beitu zinga hotu, Mandeep Singh chuan, “Khalhtu a mamawh dawn lo va, kawng chhinchhiahsak tawh chuan automatic-in a kal mai thei dawn a, a tlan pahin a in-charge thei zel a. Charge pah kher lo pawhin km 70 zet chu a kal thei,” a ti a. Kum 2014 khan khalhtu ngai lo tho, golf cart an siam tawh a, chu chu thuam tha hreta petrol, diesel leh electric hmang lo bus-a chantir tumin an bei a, kum khat vel lai an beih thu a sawi.
Faculty 5 leh zirlai naupang 300 chuangin university chhunga workshop-ah an buaipui a. Zirlai pakhat, Muskan chuan technical lam thil a buaipui thu leh bus-in khawl hmanga kawng a hmuha a zawh theih dan tur a buaipui tih a sawi.
Khalhtu ngai lo chu thil hlauhawm a nih theih avangin Muskan hian accident thlen tawhna data a pe a, chu data hlui hmang chuan bus chu a inzir thei dawn niin a sawi.
Kg 1,500-a rit bus hian mi 15 phur thei a, vantlang hman chi ai mahin (campus) vela hman chi chauh an la siam a. Kawngpuia hman tur chu an la tichhuak rih lo a ni.
Khalhtu ngai lo, ni chakna hmang bus siam chhuak
