Congress President Mallikarjun Kharge-a’n inthlan campaign-naa Prime Minister Narendra Modi-a ‘firfiak’ tia a sawi chu BJP-in an haw hle a, Election Commission of India (ECI)-ah hma la turin complaint an thehlut.
Kharge-a hian Prime Minister Modi-a hi eptu pawlte tihbuai nan sorkar thil leh central agency-te dik lo taka hmangin political party leh mipuite tihlauvah a puh.
Inthlan hmabak, Tamil Nadu-a Chennai-a Thawhlehnia thuthar lakhawmtute a kawmnaah Congress chief hian prime minister hi ‘firfiak’ tiin a sawi a, AIADMK leh BJP thawh dunna a sawisel bawk.
Thuthar lakhawmtuten a thusawi awmzia sawi fiah tura ngenna chhangin Kharge-a chuan prime minister hian mipui rorelna ram kalphung chu a ‘tihlau’ tihna a nih thu a sawi.
PTI news agency-in Rajya Sabha-a Leader of Opposition thusawi hi a tar lang a, “Mipui leh political party-te a tihlau a ni. Mi firfiak a ni tih ka sawi ngai lo. A thuneihna leh sorkar thil dik lo taka hmangin eptu party-te a tichhia a, a sawi chhiat a ni,” a ti.
ECI hnena memorandum an thehluhah BJP chuan Kharge-a hi Bharatiya Nyaya Sanhita section hrang hrang hnuaia a thusawi avang hian ‘chawitir leh a thil sawi en fiah’ an phut a, a lakah ‘campaign khuahkhirhna’ siam an phut bawk.
Party chuan an palaite, Union Minister Nirmala Sitharaman, Kiren Rijiju leh Arjun Ram Meghwal-a ten EC hmuin hemi chungchang hi an sawi chhuak dawn tih an sawi.
Kharge-a sawiselin Rijiju-a chuan Congress president thusawi chu sawichhiatna mai ni lovin, ‘mipui rorelna bulthumte beihna hlauhawm leh a hmaa la thleng ngai lo’ a nih thu a sawi.
BJP hruaitu chuan X-ah, “Congress President Mallikarjun Kharge-a thusawi rapthlak leh zahthlak tak avangin complaint kan thehlut a ni,” a ti.
Rijiju-a chuan Kharge-a thusawi hi inthlanna atana Model Code of Conduct (MCC) bawhchhiatna langsar tak a nih thu sawiin, hmalakna nghal chu ‘loh theih loh’ a nih thu a sawi bawk.
ECI-a petition thehluhah hian BJP chuan, “He thu sawi hi Model Code of Conduct bawhchhiatna a nih thu hi hre nghal rawh u. Mallikarjun Kharge-a hi mipui ngaihdam dilna/a thu sawi hnuh kirna thehlut turin hriattir rawh u, ECI thupek angin campaign khapna tur emaw, siam thatna tur dang emaw siam turin hriattir rawh,” tiin ngenna an siam.
Amit Shah chuan Congress chu ni tin ‘langsar takin a hniam zawngin an kal’ tiin a sawi a. Kharge-a chuan ‘mipui nunphunga tehfung zawng zawng a bawhchhia a, India prime minister thlan tlin, Pu Narendra Modi-a chu firfiak tia a sawi hian hnam tana mualphona a thlen’ tiin a sawi.
“He ram hruaitu lu ber sawichhiatna hi Pu Modi-a hmangaih leh thlawptu mi maktaduai tam takte sawichhiatna a ni,” a ti bawk.
Modi-a chu kum 12 kalta chhunga firfiakte titawptu nia sawiin Shah-a chuan Congress-in Modi-a an sawisel apiangin ‘Indian-ten an chhang let thin’ niin a sawi a. “Tun tumah pawh hian mipuiin an chhang ang,” a ti.
BJP hian ECI hnenah hian Kharge-a thusawi chu campaign-na atana hman leh digital-a thehdarh belh zel a awm loh nan ‘tihtawp vek theihna tur’ thupek pe turin an ngen tel.
“Chanchinbu leh social media-te chu he thil thehdarh zui a nih loh nan ti la. Inthlanna kalpui dan zahawmna humhalha zalen, dik, rem leh thubuai hrang hranga campaign a nih theih nan thupek dang a tul angin hma la rawh,” tiin an thlen.
Kharge-a’n firfiaka Modi-a a sawinana BJP-in ECI-ah thlen
