Kharge leh Gandhi ten special session koh phut

Kharge leh Gandhi ten special session koh phut
Congress president, Rajya Sabh-a Leader of the Opposition Mallikarjun Kharge leh Lok Sabha LoP Rahul Gandhi chuan Prime Minister Narendra Modi-a chu Pahalgam-a mi firfiakte chetna chungchang leh hmalak zel dan turte sawiho turin Parliament special session ko turin an ti.
Thawhtanni zana prime minister hnenah lehkha an thawnah Kharge chuan, “Hetiang hun, inpumkhat leh inlungrual a ngaih hunah hian eptute chuan parliament in hnihte a hma thei anga thutkhawm koh a tul niin ka hria,” a ti.
“Hei hi Pahalagam-a pawisawi lote April 22, 2025-a rawng taka firfiaka thahna thleng na taka a huhova kan chin fel dan tur a ni a. Session hi koh ngei pawh a nih ka beisei a ni,” a ti.
Gandhi-a pawhin Modi-a hnenah lehkha thawnin, “Pahalgam-a mi firfiakten beihna an thlen hian Indian zawng zawng rilru a tinain a tithinrim a. Hetiang hunah hian India chuan firfiakna dona lakah kan inlungrual a ni tih kan lantir tur a ni a. Eptute chuan parliament rorelna in hnih, mipuiin aiawhtu tura an thlan chhuahten a inlungrualna leh an pumkhatna an tihlanna turin thutkhawm koh ngei turah kan ngai a, chutiang chu a hma thei anga ti turin kan duh a ni,” a ti.
Congress party-a communications department chuan Thawhlehni tuk khan prime minister hnenah lehkha thawn hi an tichhuak.
Sorkar hian April 24 khan Pahalgam-a beihna thleng avang hian all-party meeting a lo ko tawh a, hetah hian Defence Minister Rajnath Singh, Union Home Minister Amit Shah leh Intelligence Bureau (IB) leh home ministry-a mi pawimawhte kovin parliament-a party hrang hranga hotute hnenah thil an hrilh fiah tawh.
Heta thutkhawmah hian Singh-a chuan sorkar chu Pahalgam-a mi 26 thahte tan hian na taka a chet dawn thu a sawi a. Eptute pawhin venhimna fel tawk lo awm palh chungchangte pawh an zawt a, sorkar chu hma an lak zelnaah an thlawp tlat tur thu an sawi bawk.
Kharge leh Gandhi ten lehkha an thawn hma lawk hian Congress chief hian all-party meet-a prime minister a tel ve lo a dem thu a lo sawi tawh a. Rajasthan-a vantlang inkhawmah Kharge chuan, “Modi-a hian ram pum aiin Bihar inthlan a dah pawimawh zawk a. All-party meeting-ah khan thil dang dah thain a tel ve ngei tur a ni,” a ti.
Tar lan tawh angin India awp chin Kashmir-a khualzinte tlawh nasat tak, Pahalgam bula Baisaran-ah hian Thawhlehni kal ta khan mi firfiakten khualzin, Indian 25 leh Nepali pakhat an that a ni.