Khaw lum uchuak takin Europe a tuam chhunzawm zel

Khaw lum uchuak takin Europe a tuam chhunzawm zel
France-ah khaw lum lutuk avanga inralrinna dar nasa taka khawn a ni a, hetih lai hian Europe chhim lam leh khawchhak lam pawh khaw lumin a la tuam zui zel.
France-ah hian an ram then, department tia an sawiah Paris leh department 15 dangah chuan Thawhlehni khan inralrinna sang ber, red alert tihchhuah niin department 68-ah a sang ber dawt, orange alert tihchhuah a ni bawk.
Thawhtanni khan department 96 awma 84 chu orange alert hnuaiah awmin Climate Minister Agnès Pannier-Runacher chuan ‘beisei phak bak’ an tawng mek tih a sawi.
Spain, Portugal, Italy, Germany, UK leh Croatia telin Balkan ramah pawh khaw lum avanga inralrinna tur tihchhuah a ni.
Spain leh Portugal chuan kartawp khan June thla awm tawha a lum ber record thar an lo siam tawh.
El Granado, Andalucía-ah chuan Inrinni khan 46°C niin Pathianni khan Portugal lailia Mora khuaah chuan 46.6°C a kai bawk.
Ram tam tak chuan emergency medical services-te inring tura tiin mipuite pawh a tam thei ang ber daihlima awm turin an ti.
France-ah hian sikul 200 dawn chawlh puan a ni a, Europe lum hian tun kar laihawl hian a vanglai a thlen rin a ni.
Pathianni khan France-ah hian Corbières tlangdung chhim lamah ram a kang nual bawk a, mi tam tak insasengin kawngpui pawh khar a ni a. Kang hi thunun leh thuai a ni tih erawh thuneituten an sawi.
Italian khawpui 21 chu inralrinna sang ber hnuaiah an awm mek bawk a, heng zingah hian Rome, Milan leh Venice bakah Sardinia-a khawpuite a tel.
Italian Society of Emergency Medicine Vice President Mario Guarino chuan heatstroke avanga buai chu 10%-a an pun thu AFP news agency a hrilh.
UK-ah pawh Thawhtanni khan June thlaa a lum ber hun an tawng hlawm a. A lum berna chu London-a Heathrow Airport-ah niin 33.1°C a kai a. Wimbledon-ah pawh 32.9°C niin tennis tournament tan nia a lum ber tum a ni.
Spain-a hmun tam zawk pawhin June-a a lum ber tum an tawng thar nual a, khaw lum laka inralrinna khawn rik chuah chuah a ni.
Portugal-ah pawh an khawpui, Lisbon telin district pasarihah inralrinna sang ber tihrik a ni.
German Meteorological Service chuan Thawhlehni leh Nilaini hian 38°C dawn a kai thei dawn niin an sawi lawk a, khaw lum ber record an siam mai thei tih an sawi bawk.
Khaw lum uchuak tak avang hian lawng kalna kawngpui, Rhine River pawh a tui kâmin bungraw phurte chu a kal tur chin bi tuk hial a ni.
Turkey-ah chuan ram a kan nasat avangin mi 50,000 chuang hmun himah dah sawn an ni a, a tam ber hi an ram khawthlang lama chawlh hmanna khawpui, Izmir-a mite niin kangthelhtuten hmun 100 chuanga tun hnaia kangmei chhuak thelh hna an thawk mek.
Ram kang hi darkar khata km 120-a chak thli thawin a pui tha hle a, in 20 vel a kang chhe tawh.
Croatia-ah pawh ram a kang a, tuipui kam hrulah khaw lum avanga inralrinna sang ber tihrik a ni a. An thenawm, Montenegro-ah pawh inralrinna tihrik a ni ve bawk.
Greece-ah chuan ni eng emaw zat chhung chu 40°C a ni deuh reng tawh a, an khawpui, Athens bula tuipui kam khuate chu an bul lawka ram kang avangin an buai mek bawk a, in tam tak chhe tawhin mi tam tak an tlanchhia.
Kar kal ta Nilaini khan Serbia-ah chuan an chhinchhiah china a lum ber ni a ni a, meteorological service chuan Thawhtanni khan ‘khaw lum uchuak tak leh khaw ro takin’ an ram pum a tuam mek tih an sawi.
Bosnia & Herzegovina khawpui, Sarajevo-ah Ningani kal ta khan 38.8°C niin Slovenia chuan Inrinni khan an rama June thlaa a lum ber ni an tawng bawk.
Zirtawpni khan North Macedonia khawpui, Skopje-ah chuan 42°C kaiin a lum belh zel an la ring.