Khaw lumin Europe a tuam, tui tla hlum an pung

Khaw lumin Europe a tuam, tui tla hlum an pung
Kar kal ta Ningani atang khan France-ah chuan khaw lum lutuk kaihhnawihah tui tla vangin mi 40 an thi tawh niin Prime Minister Sébastien Lecornu-a’n a sawi a, an khawpui lian eng emaw zat leh Europe ram eng emaw zatah khaw lum ber ni a thleng hlawm.
Sports & Youth Minister Marina Ferrari chuan French radio hnenah, “Khaw lum laia vil that loh tui hmuna kal hi palzam chi a ni lo,” a ti.
Khaw lum hi France, Spain leh Italy-ten an tuar nasa hle a. France-ah chuan June-a khaw lum ber ni chu tawngin Thawhlehni khan chawhrualin 29.8°C a tling.
Zana a lum ber chu Thawhtanni kha niin a hniam lai ber pawhin 21.6°C a ni tih Météo France chuan a tarlang a, an ram zahve aia tam chu red alert-ah an awm.
Hetihlai hian Spain-ah chuan hmun thenkhatah khaw lum chu 40°C aia sang a ni dawn a, ram pumah ni thum a lum zawn tawh a. Chhim lama Andalusia te, hmar lamah Cantabria leh Basque Country-ah red alert tihchhuah a ni.
Spain hi Europe ram dang zawng zawng aia sik leh sa inthlakin a nghawng natna a ni a. Sorkar weather service Aemet chuan June thlaa khaw lum lam hi a sang tawlh tawlh niin an sawi a, kum 2000 leh 2025 inkar khan a lum ber tum vawi 10 thleng thar a awm a, a hma kum 25 chhungin vawi hnih chiah record thar a awm tih an sawi.
Italy-ah chuan Rome, Milan, Florence, Turin leh Venice te telin khawpui 15-ah red heatwave alert puan a ni tawh a. Inralrinna hian tar emaw, natna benvawi nei emaw chauh ni lovin, puitling hrisel tha pangngai tan pawh taksa tana hlauhawm thlen thei dinhmun a ni tih hriattir a ni.
Germany-ah pawh khaw lum zel karah mi eng emaw zat tui tla hlum an awm tawh a. Kar tawp lamah hian chhim leh chhimthlangah a lum lam hi 40°C vel a kai rin a ni bawk.
German Lifesaving Association (DLRG) chuan Zirtawpni leh Pathianni inkar khan tui chennaa thihna thleng paruk a awm tih an sawi a, a bikin mipaten tui an ngam lutuk niin an sawi.
Spanish khaw chin thlirtirtute chuan Iberian peninsula-ah chuan Nilaini atang khan khaw lum a zia tan tih an sawi a. Hetih lai hian Netherlands leh Belgium bakah Germany-ah chuan Zirtawpni hi a lum ber ni a ni thei dawn tih an sawi.
Dutch weather service, KNMI chuan Code Orange weather alert a tichhuak a, hei hian Nilaini leh Zirtawpni inkarah chhim leh ram lailiah ‘khaw lum hlauhawm tak’ a awm thei dawn tih an sawi.
Thawhlehnia an thutkhawm hnuah Belgium-a Risk Management Group chuan a vawi hnihna atan ‘national ozone and heat plan-a alert phase’ an tinung tih an sawi a. A vawi khatna chu August, 2020 khan a ni a, tun tumah hian tar leh naupangte enkawlna tha zawk pe tura ngenna tih loh ram pum huapa hmalakna tur puan a la ni lo.
Khawvel hmun hrang hrangah sik leh sa inthlak nasain khua a tilum nasa em em a, Europe pawh a tuar nasa zual zinga mi an ni a. Khaw lum zawng hi a chak hle a, khawvel pum huapin a let hnih zetin a lum chak zawk niin Copernicus climate service chuan a tar lang.
Hei hian nipui a tilum zual a, Europe-a tui pekna tibuaiin leh mamawhna a tisang a, ram kang a tam phah a. Nikum khan Europe-ah hian ram hectare maktaduai khat chuang a kang a, a kan zau ber tum niin Spain-ah a tam zual.