Khaw lumin Europe a tuam zel, 40°C chum lam a ni fur

Khaw lumin Europe a tuam zel, 40°C chum lam a ni fur
Europe khawmualpui hmun zau tak chu khaw lumin a tuam mek a, ram tam taka thuneitute chuan a lum belh zel avangin hriselna nghawng thei nia ngaiin inralrinna an tichhuak.
Spain chhim lam chu a tuar na zual niin Seville leh a thenawm vel chu 40°C chung lam a ni hlawm.
Inrinni khan El Granado khuaah 46°C niin hei hi June-a a lum ber record thar niin Spain-a national weather service chuan a sawi a, June thla pum hi chhinchhiah china June a lum ber kum a ni bawk.
Portugal, Italy leh Croatia-ah chuan inralrinna sang ber tihchhuah niin Spain, France, Austria, Belgium, Bosnia & Herzegovina, Hungary, Serbia, Slovenia leh Switzerland-ah a sang ber dawt tihchhuah a ni.
Barcelona-ah Inrinni khan hmeichhe pakhat chu khawlai a phiah hun a zawh rualin a thi a, thuneituten a thih chhan an chhui mek.
Italy-ah pawh emergency department chuan ram pumah heatstroke an tam hle tih an sawi a, a tam ber hi ‘upa, cancer vei leh chenna in nei lo’ an nih thu Italian Society of Emergency Medicine Vice President Mario Guarino chuan AFP news agency a hrilh.
Naples-ah chuan damdawi in thenkhat chuan heatstroke avanga buaiten inenkawlna hmun an thlen thuai theih nan an kalna tur bik kawng an siam.
Hmar lama Bologna khawpuiah chuan climate shelter pasarih siamin boruak thununna khawl leh tui in tur an chhawp a, Rome-ah chuan vantlang tui chenna hmunte chu kum 70 chung lam tan a thlawnin an hawng.
Portugal khawpui, Lisbon-a damdawi zuar chuan ni sat zual laia khawlaia chhuak lo tura inngenna siam nu mah se heat stroke avanga buaiin an dawr hnem hle tih Reuters news agency a hrilh.
Balkans khawthlang lam ramte pawhin khaw lum hi tuarin 40°C chung a ni fur hlawm.
Serbia-ah chuan kum zabi 19-na atanga an chhinchhiah tan tawhah khua a lum ber tum an tawng a. Slovenia-ah pawh Inrinni kha June-a a lum ber tum a ni bawk.
North Macedonia-ah pawh Zirtawpni khan 42°C-a lum a ni bawk.
Hmun thenkhat chu tun kar laihawl thleng la lum turin sawi lawk a ni a. France, Germany, Italy leh UK-ah a la lum zui dawn.
Sik leh sa inthlak nasa avanga khaw awm dan uchuak tak thleng thin zirtu, World Weather Attribution-a scientist-te chuan June thla hi industry din a nih hmaa 28°C leh a chung lam aia a lum tum ni 10 chuangin a tam zawk niin an sawi.