Site icon The Aizawl Post

Khawchhak lam kuthnathawktute tlawh Wine buaipuitute tan chhiah tuk thar

Mizoram khawchhak lama Horticulture department enkawl bik kuthnathawktute hmalakna, hlawhtlinna leh harsatna enin thuthar thehdarhtute an fehchhuak a. Harsatna tawk thang wine buaipuitute chuan chhiah pek ngai awm belh tur chu an tan phurrit a ni dawn tih an sawi.

Mizoram Journalists’ Association Gen. Hqrs member-te chuan Horticulture department hnuaia Champhai leh a chhehvela kuthnathawktute hmalakna an tlawh a. Champhai Grape Growers Society enkawl Tlangsama Winery an tlawhnaah, winery an din tirh atangin harsatna tam tak an paltlang tawh a, an tana harsatna thar tih theih pawh a awm leh dawn tih an sawi. Value added tax pe turin sawrkarin a ti a, “Excise duty kan pek tawh hnua VAT pe tura tih kan ni leh hi chu, kan tan chuan rit tak a ni,” an ti.

Tuna grape wine an siamchhuah tawhte chu Excise department-in an chhiar vek a, a zat hi a danglam a nih chuan an tan a pawi dawn tih an hrilh niin an sawi. Grape wine chu sawrkar atanga license nei a zuartu (vendor) te hnena pe chhuak turin Excise department atangin challan neih hmasak a ngai a, department-ah chhiah an pekna receipt telna challan a ngai a, chu chu Excise-in an la pe chhuak thei lo a, challan tur an la print thei lo nia hrilh an ni, tih te an lo sawi. “Hei vang hian grape wine hi kan la pe chhuak thei lo,” an ti.

Tlangsam Wibery-ah hian tunah chuan grape tui sawr tur ang ang an sawr zo tawh a, um (bottle) a la thun loh litre nuai khat chuang leh uma thun sa bawm (case) 200 vel an kawl mek tih an sawi a ni.

Champhai DHO B Lalzarzova sawi danin, Champhai leh Hnahlan winery-a grape sà wrte hi Bangalore Blue variety niin, a thûr avangin a lâwnga ei tlâk a nih meuh lo. Tunah hian table variety, a lâwnga ei tlak, thlum tha leh wine atana sawr tlak tho si Mizoramah chin theih a ni em, tih green house-ah an enchhin a, green house-ah chuan a tha tih an finfiah tawh. Kumin atangin Chhungte-a Horticulture hmunah green house ni loah an enchhin dawn a, a tha tih finfiah a nih chuan loneitute chintir an tum a ni.

MJA member-te hian Ruantlang rama Tiau lui kama Farlui Zau an tlawh a. Loneitute chuan an leiletah buh chin hun ni lo, thlasik leh thál laia chin chi zikhlum chhungkaw 20 vel leh chhungkaw 30 velin chánâ an ching tih an lo hrilh.

Tualte khuaa tomato chìnna hmun an tlawhnaah Tualte Tomato Growers Society chairman R Lalchhanchhuaha sawi danin, an member ni turin tomato kung 1000 aia tlem lo chíng chin an la a, tunah hian member 223 an awm mek. Kum 2022 chhung khan tomato quintal 21679 an thar a, Rs 9,90,02,000 an lei chhuak. Kumin atangin tomato ketchup siam tan an tum a; nikum khan an tomato tharte tualchhung bakah Silchar leh Tahan-ah an hralh.

1. Chhungkua 93-in tomato an ching a, qtl. 2732 tharin, Rs 95,19,000 an lalut
2. Khaw 7-ah zikhlum an ching a, qtl. 8118 tharin, Rs 2,71,93,000 an lalut
3. Chhungkaw 32-in dawnfawh qtl. 124.15 an thar a, Rs 14,72,250 an lalut
4. Champhai leh a chhehvelah grape qtl. 1144.99 an thar a, Rs 68,69,899 an lalut
5. Hnahlanah grape qtl. 1500 an thar a, Rs 90,00,000 an lalut
6. Khaw 10-ah serthlum qtl. 1740.60 an thar a Rs 43,49,000 an lalut
7. Khaw 5-a loneituten Mizo hmarchatê qtl. 752.4 (pho ro hnuah) an thar a, Rs 18,81,000 an lalut
8. Mualkawi leh Ngur a chhungkaw 40-ten sapthei qtl.160 an thar a, Rs 5,60,000 an lalut

Exit mobile version