Khawi lam chun chawi lai nau nge maw?

Ran kianga zan mu chhing saw khawi lam chun chawi lai nau nge? Hei hi V Thangzama rilru luahtu a ni.
V Thangzama hming hre lo chuan Krismas an la hmang tlem a ni ang. Hla phuahtu a ni a, a hla tel lovin Mizovin Krismas an hmang ngai lo tiin a sawi theih ang. Krismas hla hi a phuah nual a, “Mi sak lem lohte pawh a awm a… kei chuan ‘Khawi lam chun chawi lai nau nge maw’ tih hi ka duh ber,” a ti.
He hla hi 1965 vela a phuah a ni a, Saitual BDO a nih laia a phuah niin, a hla duh deuh mai, sap hla ‘Hosana, praise the Lord’ tih hla thluk hrula a thluk hi a siam a ni.
“Isua Krista, van lalber kha ranthlengah a mu a, hei hi a mak em a ni,” tiin he hla a phuah dan a sawi a, “A pian dan kha a ropui lo. Van Pathian lo piang kham ropui lo taka a lo piang kha, tlawm tak maia a piang kha mak ka ti lutuk a, ‘Khawi lam chun chawi lai nau nge?’ ka ti ta a ni,” a ti.
Leiah Isua a lo piang hi ropui a ti a, mak a ti. Chu chu he hla a phuah hma pawha a rilru luah thintu a ni.
“Van mi mihringah a lo chang hi mak ka ti em a ni. A hma pawhin hei hi ka rilrua mak ka lo tih sa a ni,” a ti a, “Mari pawhin mak a ti,” a ti bawk.
“Pathian mihringa a lo chang kha a mak a, hmeichhiain chhulah a pai a, zawi zawiin a lo thang lian a. Pathian hian thil hi a ruahman thiam a ni. Amahah mihringte sualna zawng zawng nghatin, mihring ni chungin Isuan a phur a, a thihna chu kan damna a ni,” V Thangzama chuan a ti a, chumi a ngaihtuahna chu he hla lo pian dan a nih thu a sawi.
He hla hi a duh em em mai a, “Miin an sak pawhin ngaihnawm ka ti. Chhiar pawh a nuam ka ti,” a ti. English poetry te pawh ang a ti a, English poetry anga chhiar nuam a tih a ni he hla hi.
“He hla hi chu, mi hian min hriatpui, ka duh a ni,” ti hialin a sawi.