Home minister chuan Krismas leh kumthar vuakvetah mipuiin thlamuang taka hun an hman theihnan police-ten beihpui an thlak dawn tih a sawi a. Dan bawhchhia eng chi pawh thunun thei turin police-te an inring reng dawn a ni, a ti.
Leia rem lentir tura lo kal pian champha lawm dawn apianga ralpui phiar taka phiar a ngai ziah mai hi thil mak ve tak chu a ni; a ngai miau mai si a! He hun pui hi mipui chhuahvah tam hun a nih avangin, sual rawngbawl duh tan chuan hun rangkachak a ni a, sual tih tum ngar ngartute lo dan tum chu thil hahthlak leh buaithlak ve tak a ni.
Mak ve deuh chu, misual aiin mi Tha hi an tam zawk daih a, chutih rual chuan, kan intam hleih tehlul nen hian, a tam zawka te hi thlabar zawk an ni tlat zel mai hi a ni. Hei hi khawvel pianken pakhat chu a ni awm e.
Tunhma deuh, ruihhlo No.4/Heroin a la lar hma pawh khan, zurui mi tlemte khan khawlaiah ro an rel thei tlat zel. Zurui khawlaia pai Tuang Tuangte khan bengchheng an siam a, an au tuarh tuarh a, kawng kal an duh duh an lo pawt ding a, kut thlak an tum ut ut Thin a nih kha. Eng vanga khatianga khawlaia inluling vak vak thei kha nge an nih kan tih chuan, tute mah khan khin tinah an tin loh vang a ni ber a; ‘zurui khin te chu’ kan ti hlauh a, kan en liam mai mai a, chu chuan zuruih chingte chu a tihluhlang a, kei tak emaw an intih phah a, chu chu hmeichhia leh nunau ten an lo tawrh phah a, khawlai boruak a ralmuan loh phah ta Thin a ni.
Zawhna pakhat awm thei ta chu hei hi a ni: Zu ruih chingte khan nge khawlai kha ti ralmuang lo a, zu rui ve ngai lo, in chhunga tawm tlat zawk te khan? tih hi.
Tunah chuan zu chauh a ni ta lo, ruih theih thil chi hrang hrang hi a tam tawh lutuk a, kawmkar zawng zawng deuh thawah khuh damdawi chi hrang hrang bur ruak hmuh tur a awm a, khawi lai step kawmkil deuhah emaw chuan step sira lo inchiu ngawng ngawng tawk hmuh tur an awm zut tawh a. Khawlaiah ualau takin ruihhlo zuar leh a dawrtute an inhawr tuau tuau ngam tawh a ni.
Hei hi sawrkar hian a veng seng vek bik lo a, mipui hian sawrkar tha tichak zawnga kan thawh a ngai ve bawk. Tunah pawh hian Police-te chuan beihpui an thlak ang a, Krismas leh Kumthar vuakvetah chuan kan ziaawm pawh a ni thei e, mahse hun pui lai chauh ni lo, hun pui lai lovah pawh, mipui ralmuanna tiderthawng thei zawnga khawsate hmet dai tur hian, a khawtlang anga Tanrual thiam hi a pawimawh ber zawk awm asin!
Khawlai ralmuanna…
