Khawlai thenfai hnatlang nei leh dawn

Ruihhlo do hmalakna kal zelah ‘khawlai thenfai hnatlang’ an nei leh dawn tih Home minister K Sapdanga chuan a sawi.
Central YMA hnuaia ruihhlo do pawl, Central Anti- Drugs Squad (CADS) in kumin January 20 atanga May 1 inkara ruihtheih thil chi hrang rang an man chu Inrinni zing khan an tiral a. Hmanpuitu Home minister chuan, ruihhlo do kawngah sawrkar leh tlawmngai pawl, a bikin YMA thawhhona hlawhtlingin,an thlamuanpui tih a sawi a. Sawrkar hna hmun sawma thena hmun kua chu tlawmngai pawlte zar a ni tih a sawi. Excise & Narcotics minister-in ruihhlo do a vei hle chu lawmawm a tih thu sawiin, ruihhlo do danah tharum nena bul tan a, counselling nena hma lak zui zel chu tangkai a tih thu a sawi.
“Hemi kawngah hian kohhran pawhin nasa takin hma a la a; hetianga kan tanho zelna hian Mizo thalaite ruihhlo lakah a chhanchhuah ngei ka beisei. Hma lakna thar atan khawlai thenfai hnatlang pawh neih leh thuai a ni dawn,” a ti.
Central YMA president R. Lalngheta pawhin, ruihhlo do kumpuan hnuaia Central Anti Drugs Squad thawhrimna chhuanawm a tih thu a sawi a. Thalaite tichhetu ruihhlo lakah indo puan a ni a, thil thalo laka mahni inven reng a tul, tiin, “Ruihhlo tam tak man a ni tawh a, thalaite chhanchhuahna a nih avangin Pathian hruainaah lawmthu kan sawi a. Taima tak leh rim taka kan do zel chuan Pathianin hlawhtlinna min la pe dawn a ni,” a ti.
Tun tuma ruihtheih thil tih ral hi – heroin hawng 317 leh tictac bur 1185, ganja gram 49.230, ruihna atana hman khuh damdawi bur 1215, ruihna atana hman damdawi mum hrang hrang mum 8401 leh rakzu um 31 a ni.